Almatyda Damubala jobasyna 16,2 mlrd teńge bólindi

ALMATY. QazAqparat- Almaty ákimdigi balalardyń tegin sektsııalar men úıirmelerge barýy úshin Damubala jobasyna 16,2 mlrd teńge bólindi. Bul týraly Erbolat Dosaev Jetisý aýdanynyń turǵyndarymen kezdesý barysynda aıtty, dep habarlaıdy QazAqparat tilshisi.

Jetisý aýdanynda ornalasqan balalar zııatkerlik ortalyǵynyń jetekshisi ákimge ArtSport, qazirgi Damubala jobasynyń artyqshylyǵy týraly aıtty. Qazir ortalyqta osy baǵdarlama boıynsha 80-ge jýyq bala qosymsha bilim alyp jatyr.

«Jaqsy nátıjeler bar. Shahmattan chempıondarymyz kóp. Sondaı-aq balalarymyz oblystyq, respýblıkalyq baıqaýlarǵa qatysyp, óz ónerlerin kórsetti. Men bul jobaǵa óte rızamyn, sebebi ol ata-anasy qymbat kýrstarǵa tóleı almaıtyn balalardy damytýǵa múmkindik beredi. Qazir mende balalaryn tegin úıirmege bergisi keletin 117 ata-ana kezekte tur. Qala ákimi retinde osy jobany qoldap, ári qaraı jumys isteýge múmkindik berýińizdi suraımyn»,- dedi ol.

Almaty ákimi Erbolat Dosaev bıyl Damubala jobasyna 16,2 mlrd teńge bólingen jetkizdi.

«Men bul baǵdarlama qaı platformada jumys istese de, shyn júrekten qoldaımyn. Bıyl 16,2 mlrd teńge bóldik. Biz 75 myńǵa jýyq balany qamtydyq. Kezekte áli 32 myń bala bar. Múmkindiginshe qabyldaý jalǵasady jáne qosymsha qarajat bólemiz. Kóptegen muǵalimder baǵdarlamaǵa nemquraılyq tanytyp, balalardan góri ózderine qamqorlyq jasady. Barlyq ustazdar jaýapty bolsa, onda baǵdarlamany keńeıtýge bolady. Ekinshi jartyjyldyqta kimniń jaqsy qyzmet kórsetetinin kóremiz jáne bosaǵan qarajatty basqalarǵa baǵyttaıtyn bolamyz»,- dep jaýap berdi qala basshysy.

Buǵan deıin megapolıste 65 739 bala tegin sektsııa jáne úıirmemen qamtylǵany týraly jazǵan bolatynbyz.