Almatyda «Dala akademıgi» Jazylbek Qýanyshbaevqa arnalǵan konferentsııa ótip jatyr

ALMATY. QazAqparat - Almatyda ataqty shopan, «Dala akademıgi» Jazylbek Qýanyshbaevtyń 125 jyldyǵyna arnalǵan «Qazaqstannyń qoı sharýashylyǵy: ótkeni, búgini jáne keleshegi» taqyrybynda halyqaralyq ǵylymı-tájirıbelik onlaın konferentsııa bastaldy, dep habarlaıdy QazAqparat tilshisi.

Alqaly jıyn Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Qazaqstannyń áleýmettik jańǵyrtylýy: Jalpyǵa ortaq eńbek qoǵamyna qaraı 20 qadam» baǵdarlamalyq maqalasynan týyndaıtyn negizgi mindetterdi júzege asyrýǵa baǵyttalǵan jáne «Rýhanı jańǵyrý» baǵdarlamasynyń negizgi basymdyqtaryn jáne aýyl sharýashylyǵy salasyn damytýdaǵy ınnovatsııalyq tásilderdi nasıhattaýǵa óz úlesin qosady.

Sharanyń maqsaty - eki márte Sotsıalıstik Eńbek Eri Jazylbek Qýanyshbaevtyń ómir joly negizinde jas urpaqtyń dúnıetanymyn qalyptastyrý, «Jalpyǵa ortaq eńbek qoǵamy» ıdeıasyn dáripteý, qazaqstandyq agrarlyq bilim men ǵylymnyń áleýetin damytý.

Konferentsııaǵa QR Memlekettik hatshysy, Prezıdent Ákimshiliginiń ókilderi, Parlament Senaty men Májilisiniń depýtattary, Aýyl sharýashylyǵy mınıstrliginiń, Bilim jáne ǵylym mınıstrliginiń basshylary, oblystardyń, qalalardyń, aýdandardyń ákimderi, Ulttyq Ǵylym akademııasynyń akademıkteri, iri agroqurylymdardyń ókilderi, Qazaqstan, Qytaı, Qyrǵyzstan, Ózbekstan, Tájikstan jáne basqa da elderdiń ǵylymı-zertteý ınstıtýttary men joǵary oqý oryndarynyń basshylary men ǵalymdary qatysyp jatyr.