Almatyda dabyl belgisi iske qosylady

ALMATY. QazAqparat - Almatyda 30 qyrkúıek kúni saǵat 12:55- te dabyl (sırena) belgisi iske qosylady, dep habarlaıdy, QazAqparat tilshisi.

«2021 jyly 30 qyrkúıekte túski saǵat 12.55-te Almaty qalasy tótenshe jaǵdaılar departamenti qoǵamdyq eskertý júıesiniń daıyndyǵyn josparly tehnıkalyq tekserýden ótkizedi. Jattyǵý kezinde «Nazar aýdaryńyzdar!» habarlamasymen birge elektrondy dabyl iske qosylady. Oǵan qosa, teleradıoarnalardyń jumysy avtomatty túrde toqtatylyp, dabyl habarlamasy taratylady»,- dep habarlady tótenshe jaǵdaılar departamentinen.

Vedomstvo mamandary Almaty qalasynyń turǵyndary men qonaqtarynan sabyr saqtaýdy suraıdy.

Eger dabyl kezinde úıde bolsańyz:

- radıoqabyldaǵyshty nemese teledıdardy qosyńyz;

- tótenshe jaǵdaı týraly habarlamany tyńdańyz;

- berilgen habarlamaǵa sáıkes áreket etińiz.

Eger dabyl kezinde kóshede bolsańyz:

- kóshedegi daýys zoraıtqyshtarmen jáne mobıldi eskertý qurylǵylarymen jiberilgen tótenshe jaǵdaı týraly habarlamaǵa qulaq asyńyz;

- berilgen habarlamaǵa sáıkes áreket etińiz.