Almatyda «Bıýdjetke qatysý» jobasyna qatysýshylarǵa arnalǵan trenıngter bastalady

ALMATY. QazAqparat- «Almaty» telearnasyndaǵy Akimat LIVE baǵdarlamasynyń tikeleı efırinde megapolıs ákimi Baqytjan Saǵyntaev «Bıýdjetke qatysý» jobasy boıynsha aýmaqty abattandyrý múmkindigi týraly aıtty, dep habarlaıdy QazAqparat tilshisi.

«Bıýdjetke qatysý» jobasy boıynsha 8 aýdannyń árqaısysyna qala bıýdjetinen 800 mln teńge bólinedi. Jobanyń jalpy somasy 6,4 mlrd teńge. Bir jobanyń maksımaldy quny 58,3 mln teńgeden aspaýy tıis.

Jobaǵa qatysý úshin 1 qazanǵa deıin budget.open-almaty.kz saıtynda qalalyq ortany damytýdyń ıdeıasyn usyný qajet. Eger bul bastama basqa turǵyndardyń daýysymen qoldaý tapsa, ol qalalyq bıýdjet esebinen júzege asady.

«Bul rette, jobaǵa qatysýshylardyń daıyndyq jumystarynyń sapasyn arttyrý úshin,13 qyrkúıekten bastap «Bıýdjetke qatysý» boıynsha tegin onlaın-trenıngter Uyumdasu Participatory Budgeting áleýmettik jobasy aıasynda uıymdastyrylady.Trenıngke «Open Almaty» saıtyndaǵy silteme boıynsha tirkelýge bolady»,- dedi Baqytjan Saǵyntaev.

Aıta keteıik, «Bıýdjetke qatysý» jobasy Almatyda ekinshi jyl júzege asyrylyp jatyr. 23 tamyzdan ótinim qabyldaý bastaldy. Eki jyl ishinde saıabaqtardy, skverlerdi, aýlalardy abattandyrýǵa, sondaı-aq kópshilik paıdalanylatyn jerlerdi jaryqtandyrýǵa jáne jóndeýge jalpy quny 7,3 mlrd teńge bolatyn 322 joba (2020 j. - 49 joba, 2021j. - 273 joba) iske asty.

«Aldaǵy ýaqytta «Bıýdjetke qatysý» jobasy aıasynda qarjylandyrýdy kóbeıtip qana qoımaı, shetki aımaqtar úshin jobalardy irikteý protsedýralaryn odan ári jetildirý josparda. Osylaısha turǵyndardan jyl boıy usynystar jınaý kózdelgen»,- dedi ákim.