Almatyda «Bıýdjetke qatysý» jobasy aıasynda qandaı jumys júrip jatyr

ALMATY. QazAqparat- Almatynyń Bostandyq aýdanynda «Bıýdjetke qatysý» baǵdarlamasy aıasynda 22 joba júzege asty. Bul týraly brıfıng barysynda aýdan ákimi Altaı Rahymbetov málim etti, dep habarlaıdy QazAqparat tilshisi.

Spıkerdiń sózinshe, qala turǵyndarynyń qoǵamdyq keńistikti jaqsartýǵa, kórkeıtýge, megapolısti damytýǵa belsendi atsalysyp jatyr.

«Bostandyq aýdanynyń turǵyndary «Bıýdjetke qatysý» jobalaryn tańdaýǵa jáne talqylaýǵa qyzyǵýshylyqpen qatysady, olardyń ornyna demalys pen bos ýaqyt úshin zamanaýı ınfraqurylym alady.Mysaly, bıyl biz 9 balalar men sport alańdaryn jóndep, 13 qoǵamdyq keńistikti abattandyrdyq», - dedi Altaı Rahymbetov.

Halyqtyń az mobıldi toptaryna arnalǵan jerasty jáne jerústi jaıaý júrginshiler ótkelderine lıft pen kótergishti ornatý boıynsha eki joba aıaqtalý satysynda.

2022 jyly «Bıýdjetke qatysý» baǵdarlamasy boıynsha 21 jobany iske asyrý josparlanǵan. Bostandyq aýdanynyń turǵyndary abattandyrý boıynsha nazar aýdarýdy qajet etetin ýchaskelerdi tańdaý múmkindigine ıe boldy.

Sonymen qatar, qalada saıabaqtardy, skverlerdi, bólý jolaqtaryn, qoǵamdyq paıdalaný oryndaryn, Úlken Almaty jáne Esentaı ózenderiniń jaǵalaýlaryn, kólik aıryqtaryn jınaý jáne kútip ustaý, sondaı-aq aryq jelilerin tazalaý jumystary júrgizilýde.

Aýdanda kógaldandyrý jumystary qarqyndy júrgizilýde, bıyl 7 250 aǵash kóshetteri men 2 220 butalar otyrǵyzyldy. Kóktemde 31 941 sharshy metr alańǵa gúl otyrǵyzyldy, magıstraldy kósheler boıyndaǵy 319 gúlzar retke keltirildi.

Aýdan qyzmetteri qoqys jáshikterin, oryndyqtardy, qoǵamdyq kólik aıaldamalaryn, kóshe boıyndaǵy qorshaýlar men jolaıyryqtardy boıaý jumystaryn aıaqtady.

Sondaı-aq, fontan men murajaıdyń irgeles aýmaǵyn jóndeý aıaqtaldy.

Á. Qasteev atyndaǵy saıabaqtaǵy fontanǵa kúrdeli jóndeý jumystary júrgizildi. Úlken Almaty - ál-Farabıdegi kópir asty keńistigi aýmaqtaryn aǵymdaǵy jóndeý aıaqtaldy.