Almatyda «Bıýdjetke qatysý» jobalaryna daýys berý bastaldy

ALMATY. QazAqparat – Almatyda 2-14 mamyr aralyǵynda «Bıýdjetke qatysý» jobasy aıasynda turǵyndardyń úzdik usynystary úshin daýys berý bastaldy, dep habarlaıdy QazAqparat tilshisi.

Almaty turǵyndarynan usynystardy qabyldaý kezeńinde 897 ótinim tústi. Olardy qaraý barysynda aýdan ákimdikteri janynan «Halyq qatysatyn bıýdjet» aıasynda qurylǵan saraptamalyq keńester daýys berýge 373 ótinimdi jiberdi.

Qala turǵyndary usynǵan jobalar: balalar jáne sport alańdarynyń qurylysy; jalpyǵa ortaq paıdalanylatyn demalys oryndaryn (oryndyqtary bar shatyrlar, oryndyqtar, qoqys jáshikteri, balalar oıyndaryna arnalǵan jabdyqtar men konstrýktsııalar ornatý jáne jóndeý); jalpy paıdalaný oryndaryn jaryqtandyrý (saıabaqtar, skverler, jaıaý júrginshiler aımaqtary, kósheler jáne ózge de obektiler).

Eń kóp daýys jınaǵan jobalardy (50-den kem emes) aýdan ákimdikteri osy jyly iske asyratyn bolady.
Almaty qalasynda turaqty tirkelgen turǵyndar ǵana tańdaý jasap, unaǵan jobalarǵa daýys bere alady.
Almatylyqtar 14 mamyrǵa deıin budget.open-almaty.kz arqyly daýys beredi. Ol úshin tirkeý/avtorızatsııa talap etilmeıdi, jobalardy tańdaýdy ETsQ nemese SMS-kod kelip túsetin telefon nómiri arqyly rastaýǵa bolady.
Daýys berý qorytyndylary 2023 jylǵy 16 mamyryna deıin budget.open-almaty.kz portalynda «Jobalar boıynsha materıaldar» bóliminde jarııalanady.
Eske salsaq, 2023 jyly «Halyq qatysatyn bıýdjet» jobasyn qarjylandyrýǵa qosymsha bólingen soma – 7 mlrd teńge. Bir jobalyq usynystyń eń joǵary quny 86,2 mln teńgeden aspaýǵa tıis. Osy jobalardyń jıyntyq quny árbir aýdan úshin «Halyq qatysatyn bıýdjet» lımıtinen 875 mln teńgeden aspaýy qajet.

«Halyq qatysatyn bıýdjet» boıynsha konsýltatsııany Almaty qalasynyń aýdandyq ákimdikterinen, sondaı-aq Almaty ákimdiginiń Open Almaty qoǵamdyq qabyldaý bólmesinen + 7 (727) 224 39 29 (ishki. 203), 1308 alýǵa bolady.