Almatyda bıznesmen 50 otbasyna gazdy tegin qosyp berýge ýáde etti

ALMATY. QazAqparat – Almaty ákimi Baqytjan Saǵyntaevpen kezdesý barysynda qalany gazdandyrý máselesi qozǵaldy, dep habarlaıdy QazAqparat tilshisi.

Turǵyndardyń biri kógildir otyndy qosýdy jaǵdaıy kótermeıtin halyqqa bólip tóleýge mursat berýin suraǵan bolatyn.

Turǵynnan soń ile shala mıkrofonǵa asyqqan er adam qala ákimine óz usynysyn jetkizdi.

«Men bıznesmenmin. Qalanyń ekologııalyq ahýaly meni de qatty tolǵandyrady. Kúz túse meniń balalarym aýyra bastaıdy. Bul men úshin óte mańyzdy másele. Men qalanyń tómengi aýdandaryna barǵanda baıqaǵan nársem bar. Máselen, Dýman shaǵyn aýdanynda bir úıdi gazdandyrýǵa 300 myń teńge kerek. Keıbir otbasylar barlyǵy jabylyp 300 myń teńgeni aıyna áreń tabady. Olar sosyn birneshe jyl jabylyp jatyp sol aqshany qaıtarady. Al bıznes qaýymdastyǵy úshin 300 myń túk emes. Osy oraıda bıznesmenderge chellendj bastaǵym keledi. Men ózim 50 otbasyna gazdy tegin qosyp beremin. Meniń áriptesterim de meni qoldaıdy dep senemin», - dedi bıznesmen.

Zalǵa jınalǵan qaýym bıznesmenge rızashylyq bildirdi.

Sondaı-aq, Baqytjan Saǵyntaev almatylyqtar gaz tartý úshin paıyzsyz nesıe ala alatynyn aıtqan bolatyn.

Aıta keteıik, Almatyda Baqytjan Saǵyntaevtyń esepti kezdesýi ótip jatyr.

Jıynda ákim qala úshin 400 jańa avtobýs satyp alynatynyn habarlady.

Sondaı-aq Almaty menshigine 383,5 gektar jer qaıtarylǵandyǵyn aıtty.