Almatyda bızneske arnalǵan jeńildetilgen nesıeniń talaptary ózgerdi

ALMATY. QazAqparat - Shaǵyn jáne orta bızneske arnalǵan jeńildetilgen nesıe berý baǵdarlamasynyń sharttary ózgerdi, dep habarlaıdy QazAqparat.

Almaty qalasy ákimdigi men «Damý» kásipkerlikti damytý qory birlesip, Almaty Business óńirlik baǵdarlamasyna birqatar ózgerister engizip, shaǵyn jáne orta bıznes (ShOB) sýbektilerine jeńildikpen nesıe berý sharttaryn jetildirdi.

Ataýy Jana Business dep ózgertilgen baǵdarlamanyń qatysýshylary Almaty qalasynda tirkelgen jáne eńbek etetin shaǵyn jáne orta kásipkerlik sýbektileri bola alady.

Jańartylǵan baǵdarlamanyń sharttaryna sáıkes jeńildetilgen nesıeler boıynsha eń joǵary mólsherleme 7%-dan 6% deıin tómendetildi.

Nesıeniń maksımaldy somasy - 100 mln teńge, nesıeleý merzimi - 7 jylǵa deıin.

Jana Business baǵdarlamasynyń taǵy bir jańalyǵy – ónerkásiptik parkter sýbektilerine jyldyq mólsherlemesi 6%-ben 500 mln teńgege deıingi somada 7 jylǵa deıingi merzimge nesıe alý múmkindigi qarastyryldy.

Saýda operatsııalarynyń tıimdiligin arttyrý maqsatynda Jana Business baǵdarlamasynda faktorıngtik mámilelerdi jyldyq 8,5% mólsherlememen qarjylandyrý múmkindigi kózdeledi.

Faktorıng mehanızmi satyp alýshyǵa tólemdi keıinge qaldyra otyryp, taýardy nemese qyzmetti satyp alýǵa múmkindik beredi.

Osyndaı mámile sheńberinde faktorıngke mamandandyrylǵan qarjy ınstıtýty (faktor) belgili bir komıssııa úshin ónim berýshige taýardyń nemese qyzmettiń qunyn tóleıdi jáne onyń ornyna satyp alýshydan debıtorlyq bereshekti shartta kórsetilgen ýaqyt arqyly alý quqyǵyna ıe bolady.

Faktorıng tetigin paıdalaný kásipkerlerge taýar aınalymynyń merzimin arttyrýǵa jáne kassalyq alshaqtyqty boldyrmaýǵa múmkindik beredi.

ShOB sýbektilerine jeńildikpen nesıe berý ekinshi deńgeıdegi bankter, mıkroqarjy uıymdary jáne lızıngtik kompanııalar arqyly júzege asyrylady.

Kepildikti qamtamasyz etý jetkiliksiz bolǵan jaǵdaıda kásipkerler «Damý» qorynyń kepildikterin paıdalana alady.

ALMATY Business óńirlik baǵdarlamasy 2019 jyldan bastap júzege asyrylyp keledi.

Ony júzege asyrý barysynda Almaty qalasy boıynsha 27,3 mlrd teńgege 211 joba qarjylandyryldy, 1 340 jumys orny quryldy, 26,6 mlrd teńge salyq túsimi qamtamasyz etildi.

Taldaý nátıjesi kórsetkendeı, jobalardyń 53% astamy negizgi quraldardy, jabdyqtardy, shıkizat pen materıaldardy satyp alý maqsatynda qarjylandyrylady.