Almatyda bıyl kóktemde 700 páter jalǵa alý tártibimen beriledi - qalalyq Turǵyn úı basqarmasy

ALMATY. QazAqparat - 2015 jyly Almatyda «Nurly jol» baǵdarlamasy aıasynda 700 páter jalǵa alý júıesi boıynsha beriledi. Bul týraly búgin Almatyda ótken baspasóz máslıhaty barysynda qalalyq Turǵyn úı basqarmasynyń basshysy Qaırat Nurqadilov aıtty.

«Bıyl «Nurly jol» baǵdarlamasy aıasynda qalada 4 baǵytta páter berý jalǵastyrylady. Sonyń ishinde, 900 páter kommýnaldyq baspana boıynsha, 480 páter jas otbasylarǵa, 660 páter «Turǵyn úı Qurylys Jınaqtaýshy Banki» júıesimen, 700 baspana bıyl kóktemde jalǵa alý tártibimen beriledi», - dedi Qaırat Nurqadilov.

Páterlerdi keıin satyp alý quqyǵymen jalǵa berý Memleket basshysynyń bastamasymen qolǵa alynǵan bolatyn.

Onyń aıtýynsha, paıdalanýǵa beriletin páterlerdiń quny ózgermeıdi.

«1 bólmeli páterdi jalǵa alý quny kommýnaldyq qyzmetti qospaǵanda 35 myń teńge, 2 bólmeli páterdi alý - 55 myń teńge, 3 bólmeli páterdi alý 70 myń teńge turady. Alǵashqy 700 páter naýryzda satyla bastaıdy», - dedi Qaırat Nurqadilov.