Almatyda bıyl qandaı sport nysandary ashylady

ALMATY. QazAqparat - Almatyda jyl sońyna deıin birqatar sport nysany ashylady. Bul týraly Óńirlik kommýnıkatsııalar qyzmetinde ótken brıfıngide qalalyq Sport basqarmasy basshysynyń orynbasary Bekjan Onjan aıtty, dep habarlaıdy QazAqparat tilshisi.

«Búginde qalada qoljetimdi sporttyq ınfraqurylym salynýda, sondaı-aq biz almatylyqtardy sportpen jappaı aınalysýǵa tartyp jatyrmyz. Búginde Almatyda 3 611 sport ǵımaraty bar. Bul – stadıondar, sport keshenderi, jattyǵý ortalyqtary, shańǵy bazalary, atys tırleri, velotrek, sekirýge arnalǵan tramplın, hokkeı korttary, konkımen júgirý stadıony, tennıs korttary, ıppodrom, sport manejderi, júzý basseınderi jáne taǵy basqalar», - dedi Bekjan Onjan.

Spıker bıylǵy jyldyń sońyna deıin Jetisý aýdanynda dene shynyqtyrý-saýyqtyrý (DSK) keshenderi ashylatynyn habarlady.

Onyń aıtýynsha, DSK-nyń biri «Kemel» shaǵynaýdanynda ornalasady. Onda jekpe-jek sektsııalary, sporttyq oıyndar uıymdastyrylady. Táýliktik ótkizý qabileti – 560 adam.

Ekinshi DSK «Aınabulaq-2» shaǵynaýdanynda ashylady. Onda ámbebap jáne jattyǵý zaldary, boks jáne jekpe-jek zaldary bolady. Táýliktik ótkizý qabileti – 564 adam.

Kelesi sport ǵımaraty «Qulager» shaǵynaýdanynda Qazybaev kóshesinde boı kóteredi. Munda túrli sektsııalar ashylyp , sý sportynyń túrleri damytylady. Táýliktik ótkizý qabileti – 894 adam.

Sonymen birge Almaty qalasy Sport basqarmasy basshysynyń orynbasary úsh dene shynyqtyrý-saýyqtyrý kesheni men tennıs ortalyǵynyń qurylysy týraly aıtyp berdi.

«Medeý aýdanynyń «Alataý« shaǵynaýdanynda 7 400 sharshy metr alańda úlken DSK salynady. Qurylys kólemi boıynsha mundaı nysan Túrksib aýdanynyń «Jas Qanat« shaǵynaýdanynda paıda bolady. Onda sý sporty túrleri boıynsha sektsııalar, ústel tennısi, horeografııa sabaqtary uıymdastyrylady. Alataý aýdanynyń «Zerdeli« shaǵynaýdanynda boks jáne jekpe-jekpen aınalysýǵa arnalǵan keshen salynady», - dedi spıkeri.

Sondaı-aq 14 kortqa arnalǵan tennıs ortalyǵy salynbaq. Onda 4 jabyq jáne 10 ashyq kort bolady. Bul qaladaǵy eń iri tennıs ortalyqtarynyń biri bolmaq.

Sondaı-aq osy joba sheńberinde fıtnes jáne qalpyna keltirý rásimderine arnalǵan zal, trenajer zalyn salý kózdelgen.

Investıtsııalar esebinen «My win» sport kesheni men ústel tennısi ortalyǵynyń qurylysy júrgizilip jatyr.

Budan bólek, velotrek te jóndeýden ótedi.

Bekjan Onjan qalanyń aýdan ákimdikteri dene shynyqtyrý-saýyqtyrý keshenderin ornalastyrý úshin qosymsha alańdar berip otyrǵanyn jáne qaladaǵy sporttyq nysandar sanynyń negizgi ósimi ashyq sport alańdaryn salý esebinen bolyp otyrǵanyn málimdedi. Al qalada búginde ashyq sport alańdarynyń sany 2 409-dy quraıdy.