Almatyda bıyl birneshe memlekettik balabaqsha salynady
Onyń aıtýynsha, qalada «Almaty-2025» damytý baǵdarlamasy jáne basqa da strategııalyq josparlar aıasynda pandemııaǵa qaramastan barlyq baǵytta toqtaýsyz jumys jalǵasyp keledi. Balalarǵa sapaly bilim men sanaly tárbıe berý maqsatynda qalada bilim berý nysandaryn salýdyń arnaıy baǵdarlamasy qabyldanyp, birqatar joba júzege asyrylyp jatyr.
«Qala halqynyń jyl saıynǵy ósýimen eń kishkentaı qala turǵyndarynyń sany - mektepke deıingi jáne mektep jasyndaǵy balalar sany da ósýde. Búgingi tańda qalada bilim berý nysandarynyń belsendi qurylysy júrip jatyr, olardyń qarqynyn ótken jyldarmen salystyrýǵa kelmeıdi. Osy jyly Naýryzbaı aýdanynda «Aqjar» jáne «Taýsamaly» shaǵyn aýdandarynda jalpy 240 oryndyq 2 balabaqsha qurylysy aıaqtalady. Buryn bul jerde balabaqsha bolmaǵan. Bostandyq aýdanynda bos alańdardyń tapshylyǵy baıqalady, sol sebepti 120 oryndyq jańa balabaqsha mektep aýmaǵynda ashylady»,-deıdi ol.
Mektepke deıingi oryndardyń tapshylyǵyn tómendetý boıynsha jumysqa shaǵyn bıznes belsendi tartylýda. Bıylǵy jyldyń ózinde 5 myń oryndyq 65 jekemenshik balabaqsha ashý josparlanyp otyr. Budan basqa, JSQ ázirlenýde jáne 2,3 myńnan astam orynǵa arnalǵan 10 balabaqshanyń qurylysy úshin oryndar anyqtalýda.
Ata-analar úshin mektepke deıingi bilim berýdegi taǵy bir mańyzdy másele-tólem. Úkimet jeke balabaqshalardaǵy qosymsha qyzmetter úshin tólemdi bıýdjet esebinen ishinara óteý jónindegi bastamany qoldady, bul olardy qoljetimdi etedi.
Balamaly sheshim retinde balalary kezekte turǵan otbasylar - az qamtylǵan otbasylar, kóp balaly otbasylar, jas otbasylar, múgedek ata-analar, jalǵyz basty analar úshin vaýcherlik tetik túrinde ólshemderdi aıqyndaý máselesi qarastyrylyp jatyr.
Qazirdiń ózinde daıyndyq jumystary júrgizilýde jáne bul tetik alǵash ret Almatyda iske asyrylatyn bolady, bul 5 myń balany mektepke deıingi bilim berýmen qosymsha qamtýǵa múmkindik beredi.
«Almatyda jańa shaǵyn aýdandar, sonyń ishinde Túrksib aýdanyndaǵy «Jas Qanat» belsendi damýda. Munda 600-den astam bala baratyn eki balabaqsha jumys isteıdi. Alaıda, bul shaǵyn aýdan qurylysy jalǵasýda, sondyqtan jańa shaǵyn aýdan aýmaǵynda 280 oryndyq taǵy bir balabaqsha salý týraly sheshim qabyldandy», - dedi Qaırat Jumanov.
Sondaı-aq bosaǵan ǵımarattar bazasynda balabaqshalardy ashý boıynsha jumys júrgizilýde. Osy Jyly Áýezov aýdanynda buryn jalǵa berilgen 315 oryndyq balabaqsha iske qosylady. Qazirgi ýaqytta kúrdeli jóndeý jumystary aıaqtalýda.
«Bostandyq aýdanynyń Orbıta shaǵyn aýdanynda burynǵy balalar úıiniń ǵımaratynda eki memlekettik balabaqsha ashýdy josparlap otyrmyz, olardyń árqaısysy 320 orynǵa eseptelgen. Sonymen qatar, áýejaı aýdanynda jobalyq qýaty 320 oryndyq taǵy bir balabaqsha salynady. Jetisý aýdanyndaǵy Ratýshnyı kóshesinde 280 oryndyq memlekettik balabaqsha salynady», - dedi spıker.