Almatyda bıyl 11 myńǵa jýyq sheteldik ýaqytsha jáne turaqty tirkelý úshin HQO-larǵa ótinish bergen
«Azamattarǵa arnalǵan úkimet» memlekettik korporatsııasy Almaty qalasy fılıalynyń málimetinshe, Іshki ister mınıstriniń 2023 jylǵy 6 qańtardaǵy buıryǵymen sheteldikter men azamattyǵy joq adamdarǵa Qazaqstan Respýblıkasynda ýaqytsha jáne turaqty turýǵa ruqsat berý qaǵıdalaryna ózgerister engen bolatyn.
Atap aıtqanda, memlekettik qyzmet kórsetý kezinde sheteldiktiń ýaqytsha turýy úshin paıdalanylatyn turǵyn úı ıesiniń nemese notarıaldy kýálandyrylǵan senimhat boıynsha senim bildirilgen adamnyń jeke qatysýy qajet ekendigi týraly tolyqtyrý engizildi.
Sondaı-aq, sheteldik nemese azamattyǵy joq adam turǵylyqty jerin aýystyrǵan kezde esepte turǵan ishki ister organynan onyń jeke is-qaǵazdary suralady degen jańa tarmaq qosyldy. Bul rette sheteldiktiń nemese azamattyǵy joq adamnyń jańa turǵylyqty jeri boıynsha tirkeý ótinish jasalǵan kúni júzege asyrylady.
Atalǵan ózgerister bıyl 22 qańtardan bastap kúshine endi.
«Memlekettik korporatsııa arqyly tirkeý úshin qujattardy qabyldaǵan kezde, ótinish berýshige qujattardy qabyldaǵany týraly qolhat beriledi. Qujattardy qabyldaý kúni memlekettik qyzmet kórsetý merzimine kirmeıdi. Sheteldik qujattar toptamasyn tolyq usynbaǵan nemese qoldaný merzimi ótken qujattar bolǵan jaǵdaıda, ótinishti qabyldaýdan bas tartylady jáne qujattardy qabyldaýdan bas tartý týraly qolhat beriledi. Aıta keteıik, Almaty qalasynyń HQO-lary 2022 jyly sheteldikterdi ýaqytsha jáne turaqty tirkeý boıynsha 10 309 ótinish qabyldap, 6190-y oń jaýap aldy. 2023 jyldyń qańtar aıynda 11 916 ótinish qabyldanyp, 9 519-y maquldandy» - dedi Azamattarǵa arnalǵan úkimet» memlekettik korporatsııasy Almaty qalasy fılıalynyń PR menedjeri Jańyl Ápetova.
Aıta keteıik, Almatyda memlekettik qyzmetti tómendegi HQO-lardan alýǵa bolady:
Áýezov aýdanynyń Halyqqa qyzmet kórsetý bólimi, Jandosov kóshesi, 51, Alataý aýdanynyń Halyqqa qyzmet kórsetý bólimi, «Alǵabas-1» shaǵyn aýdany,, 5 úı, korpýs-17, Almaly aýdanynyń Halyqqa qyzmet kórsetý bólimi, Bógenbaı batyr kóshesi, 221, Bostandyq aýdanynyń Halyqqa qyzmet kórsetý bólimi, «Almagúl» shaǵyn aýdany, 9a, Medeý aýdanynyń Halyqqa qyzmet kórsetý bólimi, Markov kóshesi, 44, Túrksib aýdanynyń Halyqqa qyzmet kórsetý bólimi, Rıhard Zorge k-si, 9, Jetisý aýdanynyń Halyqqa qyzmet kórsetý bólimi, Serikov kóshesi, 6A, Naýryzbaı aýdanynyń Halyqqa qyzmet kórsetý bólimi, «Shuǵyla» shaǵyn aýdany, 222/5, Kóshi-qon boıynsha HQO, Túrksib aýdany, «Qaırat» shaǵyn aýdany, 181-182, («Jetisý-Semıreche» bazary, 2- qabat).