Almatyda Birlik kúni merekesi toılanyp jatyr

ALMATY. QazAqparat - Ońtústik astanalyqtar Qazaqstan halqynyń birligi kúnin toılap jatyr. Respýblıka saraıynyń aldynda kóptegen ulttardyń salt-dástúrine saı qolóner týyndylary men ulttyq tamaǵy, kıimderi qoıylǵan otyz birlestik úıi tigildi, dep habarlaıdy QazAqparat tilshisi.

Abaı alańyna halyq kóp jınaldy. Kóńilderi kóterinki, bir-birin quttyqtap jatyr. Árbir ult óziniń mádenıetinen syr shertetin kórme usyndy. Ánin shyrqap, bıin bıledi. Yntymaǵy jarasqan elde turyp jatqandaryn maqtan tutatyndaryn talasa aıtty.

«Dostyq pen yntymaq bar jerde, bereke men yrys bolary aıdan anyq. Birligi berekeli, tirligi merekeli, yntymaǵy jarasqan eldiń ǵana yrysy men tabysy mol bolmaq. Aýyzbirlik pen túsinistik, qarapaıym syılastyq ústemdik qurǵan jerlerge qashanda nátıjeli isterdiń úıir bolatyny belgili. Ult pen ulystyń tatýlyǵy arqasynda, búginde, memleketimiz órkendep, ilgeri damyp kele jatyr. Jańa Qazaqstan kezeńi bastaldy. Osy oraıda, mamyrajaı mamyrdyń alǵashqy merekesinde Qazaqstandaǵy barsha ulys kóńili daladaı darhan qazaq jurtyna rızashylyǵyn bildirip jatyr», – deıdi túrik ultynyń ókili Zarına Ahmetova.

Merekelik sharaǵa jınalǵandar qazaq qashannan da baýyrmal halyq ekenin tilge tıek etti.

«Ár kezeńderde elimizden pana izdep kelgen ózge ult ókilderin jatsynbaı bárin baýyryna basyp, tórinen oryn berip, qandaı qıyn kezeńderdiń ózinde bir úzim nandy bólip jedi. Búgin elimizde 130- dan astam ult pen ulystyń ókilderi bir týdyń astynda tatý-tátti ǵumyr keship jatyr. Barlyǵymyz týǵan jerdiń tósinde, qushaǵyn jaıǵan beıbit eldiń ishinde el birligin saqtaýǵa atsalysaıyq»,- dedi qala turǵyny Berik Ábdireshov.

Armıan etnomádenı birlestiginiń ókili Anna Torasıan birlik merekesin jastar jete túsinýi kerek ekenin aıtty.

«Men barsha qazaqstandyqtardy 1 mamyr - Qazaqstan halyqtarynyń birligi merekesimen shyn júrekten quttyqtaımyn. Ásirese, jastar bul meıramnyń mán-maǵynasyn jaqsy túsinse eken deımin. Bir shańyraqtyń astyndaǵy halqymyzdyń dostyǵy men ózara túsinistigi odan ári jalǵasyp, elimizdegi ultaralyq tatýlyq árdaıym berik bolyp, qashan da yntymaq, birlik máńgi jasaı bersin»,- Anna Torasıan Armıan etnomádenı birlestiginiń ókili.

Merkelik shara kontserttik baǵdarlamamen ulasty.

Aıta keteıik, Qazaqstan Halyqtarynyń Birligi kúninine arnalǵan is-sharalar qalanyń barlyq aýdanynda toılanyp jatyr.