Almatyda bir balany mektepke daıyndaý úshin qansha qarjy kerek

ALMATY. QazAqparat – Jańa oqý jyly bastalatyn kún jaqyndaǵan saıyn daıyndyq ta qyza tústi. Qajetti kıim-keshek pen oqý quraldaryn qaı jerden satyp alamyn deseńiz de tańdaý ózińizde. Al, bir bala mektepke daıyn bolyp barý úshin qansha qarjy qajet? Bul saýldyń jaýabyn tabý úshin QazAqparat tilshisi halyq eń kóp baratyn mektep jármeńkesine, bazar men iri saýda dúkenderine baryp, baǵalaryn bilip qaıtty.

Sonymen, Almatynyń «Kók bazaryndaǵy» oqý-quraldary men mektep formasynyń qunyna toqtalsaq. Qyz balaǵa arnalǵan aq koftanyń arzany 6000 teńgege baǵalansa, sapasy jaqsyraǵy 10 myń teńgeden joǵary. Beldemshe – 7000 teńge, keýdeshe – 8500 teńge, shashqa taǵatyn aq bantıktiń eki danasy – 2000 teńge, týflı – 15 000 teńge, sporttyq aıaq kıim – 12 500 teńge, aq fýtbolka – 3000 teńge, sporttyq shalbar – 6000 teńge (dene shynyqtyrý sabaǵyna), aq kolgotkı – 3500 teńgeden satylyp jatyr. Ortasha baǵada alǵan kúniń ózinde bir balaǵa kem degende 68 myń teńge qajet. Ul balanyń kıimi sál arzanǵa túsedi.

Bul – bazardaǵy baǵa. Al endi keıbir kıim dúkenderimen salystyratyn bolsaq, mektep formasy anaǵurlym qymbatqa shyǵady. Máselen, ol jerlerde aq kóılek 16 000 teńgeden, beldemshe ólshemine qaraı 14-18 myń teńge aralyǵynda, pıdjak – 23000-25000 teńge, shalbar 15 myń teńgeden joǵary, uldarǵa arnalǵan kostıým-shalbar (bastaýysh synyp) 32-35 myń teńge. Týflıdiń baǵasyna keler bolsaq, qyzdarǵa 27000-nan, uldarǵa 19000 teńgeden satylyp jatyr.

Balalarǵa qajet kıim-keshekten bólek, oqý quraldarynyń baǵalaryn anyqtadyq. 12 bettik dápter – 20-35 teńge, kúndelik – 1000 teńge, jelim – 350 teńge, óshirgish – 260 teńge, ushtaǵysh – 200-400 teńge, qaryndash – 50-150 teńge, qalam – 165 -1035 teńge, túrli-tústi qaryndash 800-1500 teńge, syzǵysh – 150-den, sýret dápter – 1000 teńge, penal 800 – 4500 teńge, dápter men kitap qaptarynyń 10 danasy – kem degende 1500 teńge, rıýkzak – 5500 teńgeden bastalady.

Ata-analardyń aıtýynsha, ár jerde uıymdastyrylyp jatqan mektep jármeńkelerindegi taýarlardyń baǵasy arzan bolǵanymen, sapasy óte tómen. Sondyqtan, kópshilik qaltasy kóteretin, sapasy ortasha taýardy alýǵa tyrysady.

Al, saýdagerler byltyrǵymen salystyrǵanda oqý quraldarynyń quny 30 paıyzǵa, mektep formasy 40-45%-ǵa deıin kóterilgendigin aıtty.