Almatyda bir aıdyń ishinde karantın talaptaryn buzǵan 4 002 nysan anyqtalǵan

ALMATY. QazAqparat – Almatynyń 8 aýdanynda kúndelikti 40-qa jýyq monıtorıngtik toptar jumys isteýde. Bul týraly Almaty qalasy ákiminiń orynbasary Erjan Babaqumarov Ortalyq kommýnıkatsııalar qyzmetinde ótip jatqan onlaın brıfıngte aıtty, dep habarlaıdy QazAqparat tilshisi.

«Almatyda monıtorıngtik toptar kúndelikti, kúndizgi jáne túngi ýaqyttarda, qoǵamdyq kólikterde, metroda jumystar júrgizýde. Onyń ústine qalalyq ákimdikte qalada sanepıdemııalyq jaǵdaıdy taldaý boıynsha apta saıyn jıyn ótip turady. Monıtorıngtik toptar Almatyda da KVI taralýyna qarsy kúrestiń tıimdi tetigi bolyp qala beredi»,- dedi Erjan Babaqumarov.

Monıtorıngtik toptardyń jumysynyń nátıjesi boıynsha aǵymdaǵy jyldyń 1 qańtary men 5 qazan aralyǵynda 4 436 reıd júrgizildi, 41 832 nysan qamtyldy, karantındik shekteýlerdi buzǵan 4 002 obekt anyqtaldy. 6 248 hattama jasaldy, onyń ishinde zańdy tulǵalarǵa 704, jeke tulǵalarǵa maska rejımin buzǵany úshin 5 544 hattama toltyryldy. Sottarǵa karantındi jıi buzatyndardyń 78 materıaly berildi, al sottar 44 nysannyń qyzmetin toqtatty.

Erjan Babaqumarovtyń aıtýynsha, tamyz aıynan bastap kúndizgi jáne túngi reıdter shekteldi, sondaı-aq qoǵamdyq kólikte sanıtarlyq-epıdemıologııalyq qaýipsizdik sharalarynyń saqtalýyna tekserýler júrgizilýde.

«Kúndiz – 631, túnde – 605, qoǵamdyq kólik boıynsha – 372 reıd júrgizildi. Kúndizgi reıdpen – 3 823 obekt (buzýshylyqtar 169-da anyqtaldy), túngi reıdpen – 4 409 obekt (buzýshylyqtar 237 obektide anyqtaldy) qamtyldy. Qoǵamdyq kólikte 468 jeke tulǵanyń betperde rejımin buzǵany anyqtaldy»,- dedi spıker.

Apta saıynǵy baǵalaýǵa sáıkes, qala turǵyndary indet juqtyratyn negizgi oryndar: saýda obektileri – 35%, bazarlar – 11%, qoǵamdyq kólik – 18%, otbasylardaǵy baılanystar 16% bolyp otyr.