Almatyda bezgek masalarynyń dernásilderine qarsy óńdeý jumystary bastaldy
Almaty qalalyq sanıtarııalyq-epıdemıologııalyq baqylaý departamentiniń málimetinshe, qala turǵyndary arasynda sanıtarııalyq-epıdemıologııalyq salamattylyqty qamtamasyz etý jáne bezgek masalarynyń dernásilderin azaıtý maqsatynda 7 maýsym - 29 qyrkúıek aralyǵynda aýdany 14,4 ga bolatyn (Alataý, Jetisý jáne Túrksib aýdandarynda ornalasqan) 7 anafelogendi sý qoımasynda bezgek masalarynyń dernásilderine qarsy dezınsektsııalyq óńdeý sharalary júrgiziledi.
Óńdeý jumystary entomologııalyq kórsetkish boıynsha alty kezeńde júrgiziledi.
«Óńdeý jumystaryn aýdandyq sanıtarııalyq-epıdemıologııalyq baqylaý basqarmalarynyń mamandarynyń baqylaýymen «Almaty qalasy boıynsha dezınfektsııa ortalyǵy» fılıaly júrgizedi. Jasaqtalǵan dezınfektsııalyq brıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan. Dezınsektsııalyq óńdeý júrgizý úshin «Favorıt» ınsektıtsıdti-akarıdıtstik preparaty qoldanylady. Preparat az ýytty jáne qaýiptiligi tómen sanatqa jatqyzylady (3-4 klass). Masalarmen kúresý úshin qoldanylatyn dozalar eń az jáne adam men janýarlar úshin qaýipsiz bolyp tabylady«, - dep habarlady qalalyq sanıtarııalyq-epıdemıologııalyq baqylaý departamentiniń baspasóz qyzmeti.