Almatyda bereshegi bar 3 kompanııanyń laýazymdy tulǵalary jaýapqa tartyldy

ALMATY. QazAqparat - Múlik jáne jer salyǵyn tólemegenderdiń shottary buǵattalady. Bul týraly Almaty qalasy boıynsha memlekettik kirister departamentiniń basshysy Qanat Baedilov aıtty, dep habarlaıdy QazAqparat tilshisi.

«Bizdiń jumysymyzdyń mańyzdy baǵyttarynyń biri - salyq bereshegin óndirip alý, ıaǵnı salyqty ýaqtyly tólemegen salyq tóleýshilerge sharalar qoldaný. Bul jumys búgingi tańda avtomattandyrylǵan, ıaǵnı bereshek paıda bolǵan kezde aqparattyq júıe arqyly salyq tóleýshige habarlama joldanady, banktik shottarǵa buǵat qoıylady», - dedi ol.

Spıkerdiń sózinshe, búgingi kúni megapolıste salyqtar boıynsha bereshek somasy - 146 mlrd teńge.

«Sonyń ishinde, bereshektiń qomaqty mólsheri nemese 94 mlrd teńgeden astam somasy qylmystyq ister barysynda - 3 býkmekerlik kompanııaǵa qatysty taǵaıyndalǵan tekserý nátıjeleri boıynsha paıda bolǵan qaryz. Bul kompanııalardyń laýazymdy tulǵalary sot úkimi boıynsha ártúrli merzimge bas bostandyqtarynan aıyryldy», - dedi Qanat Baedilov.

Onyń aıtýynsha, ázirge, bul somadan 16,9 mlrd teńge óndirip alyndy.

«Atap aıtar bolsam, «Alpha-bet» JShS-nen - 6 813 mln teńge, «OLIMP KZ « JShS-nen - 868 mln teńge jáne «Onlybet» kompanııasynan - 9 219 mln teńge. Sot oryndaýshylarymen birge jumystar jalǵasýda», - dedi ol.

Sonymen qatar, ol bankrottyq rásimder jeńildetilgenin jetkizdi.

«Kásiporynnyń tólem qabiletsizdigin anyqtaýdyń jalǵyz krıterııi - boryshtyń aktıvterden asyp ketýi. Ótken jyly 173 boryshker, al aǵymdaǵy jyldyń birinshi toqsanynda 37 boryshker bankrot bolyp tanyldy. Olar boıynsha bereshektiń esepten shyǵarylǵan somasy 88,6 mlrd teńgeni qurady», - deıdi spıker.