Almatyda Baıtursynulynyń mýzeı úıi kúrdeli jóndeýden keıin ashyldy
«Bıyl ult ustazy, memleket jáne qoǵam qaıratkeri, ǵalym-reformator - Ahmet Baıtursynulynyń týǵanyna 150 jyl toldy. Almaty qalasy mádenıet basqarmasynyń qoldaýymen Ahmet Baıtursynulynyń mýzeı-úıine kúrdeli jóndeý júrgizilip, ekspozıtsııasy jańartyldy», - delingen «Almaty qalasy mýzeıler birlestigi» KMQK taratqan habarlamada.
HH ǵasyrdyń uly reformatory, qoǵam jáne memleket qaıratkeri, lıngvıst-ǵalym, qazaq fılologııa ǵylymynyń negizin qalaýshy, aqyn-aýdarmashy, túrkitanýshy Ahmet Baıtursynulynyń mýzeı-úıi 1993 jyly ashylǵan. Mýzeı-úıdiń janyndaǵy Baıtursynulynyń bıýsti 1998 jyly ornatylǵan.
«Almaty qalasy ákiminiń 2021 jylǵy 13 qazandaǵy №4/508 qaýlysymen mýzeı-úı jekemenshikten Almaty qalasynyń kommýnaldyq menshigine berildi. Jańarǵan mýzeı-úı 3 ekspozıtsııalyq jáne bir dáris zalynan turady. Qazirgi ýaqytta mýzeıde ǵalymnyń ómiri men shyǵarmashylyǵy týraly 500-ge jýyq eksponat jınaqtalǵan. Bul – memlekettik arhıvten alynǵan túpnusqa qujattar, jeke jáne ujymdyq fotosýretter»,- delingen habarlamada.
«Almaty qalasy mýzeıler birlestigi» KMQK málimetinshe, mýzeı zamanaýı tehnologııalarmen jabdyqtalyp, jańa mazmunmen toltyrylyp, jańa sıpat aldy.
Arnaıy sensorly taqtalarda mýzeı-úıdiń qurylý tarıhy, arhıv materıaldary, fotosýretter jáne reformatordyń ómiri men shyǵarmashylyq joly týraly mol maǵlumat beretin qundy málimetter bar.
Aıta keteıik, búgin Prezıdent Almatyda Ahmet Baıtursynulyna arnalǵan eskertkishti ashty.
Buǵan deıin Almatyda Ahmet Baıtursynulynyń 12 tomdyq shyǵarmalar jınaǵy jaryqqa shyqqan bolatyn.