Almatyda bastaýysh mektepter turǵyn úı keshenderiniń birinshi qabattaryna ornalasýy múmkin

ALMATY. QazAqparat – Almatyda bastaýysh synyp oqýshylary turǵyn úılerdiń birinshi qabatynda oqýy múmkin. Bul týraly Ortalyq kommýnıkatsııalar qyzmeti alańynda ótken baspasóz máslıhatynda Almaty qalasynyń ákimi Erbolat Dosaev aıtty, dep habarlaıdy QazAqparat tilshisi.

Onyń aıtýynsha, memlekettik mektepterdiń bastaýysh synyptaryn fılıal retinde turǵyn úı keshenderiniń birinshi qabattarynda ornalastyrý tetigi qarastyrylyp jatyr.

«Almatyda «basqarylatyn tapshylyq» orta merzimdi saıasaty iske asyrylatyn boldy. Jańa memlekettik jáne jekemenshik bilim berý obektilerin salý esebinen oryn tapshylyǵy qysqarady. Memlekettik mektepterdiń bastaýysh synyptaryn fılıal retinde turǵyn úı keshenderiniń birinshi qabattarynda ornalastyrý tetigi qarastyrylyp jatyr. Osylaısha, 2022 jyldyń basynan beri 3 316 oryndyq 54 jekemenshik balabaqsha ashyldy, osy jyldyń sońyna deıin taǵy 1 460 oryndyq 17 balabaqsha, onyń ishinde, 560 oryndyq 2 memlekettik balabaqsha ashylady», - deıdi qala ákimi.

Sonymen qatar, megapolıs basshysy jyl sońyna deıin 3-6 jas aralyǵyndaǵy balalardy mektepke deıingi bilimmen qamtý 2,4%-ǵa, mektepterdegi oqýshy oryndarynyń sany 5%-ǵa deıin ósetinin atap ótti.

«Bıyl orta bilim berý salasynda 13,8 myń orynǵa eseptelgen 18 obektini paıdalanýǵa berý josparlanyp otyr. Onyń ishinde 10 750 orynǵa 11 jańa mektep, 1 270 orynǵa 5 qosymsha qurylys, 1 800 oryndyq 2 ǵımaratty satyp alý josparda», - dedi Erbolat Dosaev.