Almatyda «Bastaý Bıznes» jobasy boıynsha 583 mln teńge grant beriledi

ALMATY. QazAqparat - Almatyda sáýirde «Bastaý Bıznes» jobasy boıynsha jas kásipkerlerge 1 000 grant beriledi. Bul týraly onlaın brıfıng barysynda Almaty qalasy Kásipkerler palatasynyń dırektory Aıtýar Qoshmambetov aıtty, dep habarlaıdy QazAqparat tilshisi.

Atalǵan joba boıynsha oqytý sáýirde bastalady. Bıyldyń ózinde 2000 adamdy oqytý josparlanǵan.

«Bastaý Bıznes» jobasyn iske asyrý bıyl da jalǵasady. Sondaı-aq, 200 AEK (583 400) teńge mólsherinde 1 000 grant qarastyrylǵan. Joba bıyl sáýirde bastalady», - dedi A.Qoshmambetov. Bıylǵy oqytý koronovırýstyq ınfektsııany taratpaý boıynsha qabyldanǵan sharalarǵa baılanysty 2020 jyldaǵydaı atamekenacademy platformasynda onlaın rejıminde júrgiziledi.

Aıta ketý kerek, Almaty qalasynda «Bastaý Bıznes» jobasy 2019 jyldan bastap «Eńbek» nátıjeli jumyspen qamtý jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasynyń ekinshi baǵyty sheńberinde iske asyp keledi.

«Atameken» QR UKP qarjylyq emes qoldaý operatory bolyp tabylady, Baǵdarlama sheńberinde oqýǵa úmitkerler tiziminen «Bastaý Bıznes» jobasy boıynsha qatysýshylardy oqytýdy uıymdastyrady.

Jalpy, Almaty qalasynda 2017-2021 jyldarǵa arnalǵan «Eńbek» nátıjeli jumyspen qamtý jáne jappaı kásipkerlikti damytý memlekettik baǵdarlamasy aıasynda 2019-2020 jyldary kásipkerlik negizderi boıynsha 9 500 qatysýshy oqyǵan. Onyń ishinde 4 572 túlek óz startapyn iske asyrýǵa 200 AEK mólsherinde memlekettik grant alǵan.