Almatyda barlyq ónerkásip oryndary men bazarlar jumystaryn qaıta bastady

ALMATY. QazAqparat - Búgin Almatyda barlyq 120 ónerkásiptik kásiporyn, 7,7 myń qyzmet kórsetý nysany jáne 51 bazar jumysyn qaıta bastady. Bul týraly qala ákiminiń orynbasary Maqsat Qıqymov aıtty, dep habarlaıdy QazAqparat tilshisi.

Onyń aıtýynsha, 110 azyq-túlik emes saýda obektileriniń 99-y, 93 saýda oıyn-saýyq ortalyqtary men saýda úıleriniń 87-i, 220 janar-jaǵar maı quıý stantsııasynyń 190-y, 3 100 qoǵamdyq tamaqtaný obektileriniń 3068-i, sondaı-aq 975 dárihana óz qyzmetin qaıta jandandyrdy.
Azyq-túlik saýda obektileri boıynsha búgingi kúni qalada 149-dan 145 (97,3%) jumys isteıdi, qalǵan tórt fılıal (úsheýi – «Magným», bireýi – «Interfýd») 24 qańtarǵa deıin qyzmetin qalpyna keltirýdi josparlap otyr.
«Almaty óndirýshileri men óńirlerden azyq-túlik jetkizýdiń barlyq arnalary qalpyna keltirildi. Qala boıynsha azyq-túlik taýarlarynyń tapshylyǵy baıqalmaıdy», - dedi qala ákiminiń orynbasary.