Almatyda barlyq magıstraldy kóshelerdegi jol jóndeý jumystary aıaqtaldy
Jańa jol belgileri syzylǵan joldarda kólik qozǵalysy ashyldy.
Almaty ákimi Baýyrjan Baıbek kezekti jumys saparynda jol jáne kommýnaldy ınfraqurylymdy qaıta jasaý jumystarynyń barysyn tekserdi.
Búginde magıstraldy kóshelerdegi josparlanǵan 151 shaqyrym joldyń barlyǵyna ortasha jóndeý jumystary júrgizildi. Aýdandyq mańyzy bar 85 kóshelerdegi jóndeý jumystary qazan aıynda aıaqtalady. 32 trotýarlardyń 26 shaqyrymy jańartyldy jáne jóndeldi. Bıylǵy jyly qala boıynsha 317 shaqyrym sý qubyry men 265 shaqyrym káriz jelisin salýǵa jáne qaıta jasaýǵa qarjy bólindi. Uzyndyǵy 284 shaqyrym bolatyn jańa sý qubyry bıyl kúzde 175 myńnan astam adam turatyn 35 myń turǵyn úıdi sýmen qamtýdyń ortalyq júıesine qosýǵa múmkindik beredi.
Shevchenko jáne Konaev kóshelerinde kólik qozǵalysy ashylyp, relster alynyp tastaldy.
Orbıta yqsham aýdanynan Kókbazarǵa deıingi velodálizdiń bir bóligi bolyp tabylatyn velojoldar abattandyrylyp jatyr.
Kúrdeli jóndeý jumystary júrgen Baıtursynov kóshesi boıymen Tımırıazev kóshesinen Abaı dańǵylyna deıingi joldar aýmaǵy da jóndelip, munda da kólik qozǵalysy ashyldy. Trotýarlar men velojoldar kóriktendirilip jatyr. Jandosov kóshesiniń uzyndyǵy 2,8 shaqyrym bolatyn ýchaskesindegi kúrdeli jóndeý jumystary da aıaqtalyp qaldy. Qazirgi kezde munda qozǵalys bóligi , trotýarlar men velojoldar abattandyrylyp jatyr.
Asqarov kóshesinen Ál-Farabı dańǵylynyń batys bóligindegi uzyndyǵy 3,5 shaqyrym bolatyn sý júıesi qaıta jasalýda. Sonyń arqasynda qyrkúıek aıynda 200 myńǵa jýyq qala turǵyny aýyz sýmen qamtamasyz etiledi. Qala ákimine qaıta jasalǵan ýchaskege qara asfalt tóselgen soń 30 tamyzda kólik qozǵalysynyń ashylatyndyǵy baıandaldy.
Almaty ákimi Energetıka jáne kommýnaldy sharýashylyq basqarmasynyń basshysyna jumysty jedeldetýdi ári sapaly atqarýdy, aýmaqty kóriktendirýge basa nazar aýdarýdy tapsyrdy.
Megapolıs basshysy Jubanov, Tóle bı, Mámetova jáne Qazybek bı kósheleri boıyndaǵy jylý júıelerin qaıta jasaý jumystaryn da tekserdi.
«Tóle bı - úlken kólik legi bar magıstarldy kóshe. Munda uzyndyǵy 1,6 km bolatyn aýmaqta kúsheıtilgen rejımde jóndeý jumystary júrýde, tehnologııalyq protsess tolyq saqtalýda. Jumysty 25 qyrkúıekte aıaqtaýdy josparlap otyrmyz.Tóle bı boıymen Masanchıge burylatyn jerden Qarasaı batyrǵa deıingi aýmaqtaǵy jóndeý jumystaryn tamyz aıynda bitiremiz, sonymen qatar Mametova men Qazybek bı kóshelerindegi jóndeý jumystaryn da osy merzimde tolyq aıaqtaımyz», - dedi «Almaty jylý júıesi» JShS dırektory Erbolat Amanǵalıev.
Jalpy, jańa jylý maýsymyna deıin uzyndyǵy 32 shaqyrymnan asatyn jylý júıeleri jóndeýden ótedi. Bul ótken jylmen salystyrǵanda 2,7 ese kóp. Jelige jańa ızolıatsııalanǵan qubyrlar salynyp jatyr. Bulardyń paıdalaný merzimi 40 jyl.
Sonymen qatar, qalada Fýrmanov, Abaı, Hmelnıtskıı kóshelerin uzartý jáne birneshe jolaıryqtaryn salý jumystary odan ári jalǵasady. Abaı dańǵyly boıyndaǵy Esentaı ózeni arqyly ótetin kópirde kúrdeli jóndeý jumystary júrýde. Onyń soltústik bóligindegi kólik qozǵalysy - 1 qyrkúıekte, al ońtústigindegi kólik qozǵalysy 1 qazanda ashylatyn bolady.
Qalanyń ınjenerlik-kommýnıkatsııalyq qurylymyn damytý máselesi «Almaty-2020» Damý baǵdarlamasynda jan-jaqty kózdelgen.
Atalǵan qujat 2015 jyly qoǵamdyq talqylaýdan ótti.
Qaladaǵy tótenshe jaǵdaıdy boldyrmaý maqsatynda qala aýmaǵyndaǵy (onyń ishinde qosylǵan) sý qorǵaý jolaqtarynyń, ózenderdiń arnalarynyń, kanaldardyń, sýsharýashylyǵy qurylǵylarynyń jekelegen bólikterin qaıta jańǵyrtýdyń jobalyq-smetalyq qujattaryn ázirleý, qalanyń kishi ózenderiniń arnalarynyń jekelegen bólikterin qaıta jańǵyrtý, sý nysandarynyń sý qorǵaý jolaqtaryn qaıta jańǵyrtý jáne abattandyrý, kommýnaldyq menshiktegi sýsharýashylyǵy qondyrǵylarynyń qyzmetin qamtamasyz etý, aryq jelileri men nóser kárizderin qaıta jańǵyrtý jáne salý kózdelgen.
2020 jylǵa deıin Almatydaǵy barlyq aryqtar jańartylýy tıis.
Ótken jyly ákimdik qyzmetkerleri 1000 shaqyrym aryq jelisin teksergen edi. tekserý barysynda 500 km aryq jelisin aýystyrý kerektigin anyqtaldy.
Bıyl qalada 100 shaqyrym aryq jelisi jańartylsa, kelesi jyly qalǵan 400 shaqyrym aryq jelisi tolyq aýystyrylady.
Sonymen qatar, baǵdarlama boıynsha sýmen jabdyqtaý, sýdy aǵyzý júıesindegi shyǵyndar men tozýdy tómendetý, onyń ishinde jyl saıyn 30 shaqyrymǵa deıin qaıta jańǵyrtý esebinen kúrdeli, apatty jóndeýler kólemin arttyrý qarastyrylǵan.
2020 jylǵa qaraı jaqsy jáne qanaǵattandyrarlyq jaǵdaıdaǵy jergilikti avtomobıl joldarynyń sapasyn 80%-ǵa arttyrý kózdelgen. 2015 jyly bul kórsetkish 65% boldy.
2020-ǵa deıin ınjenerlik jelilerdiń tozý kórsetkishin tómendetý josparlanyp otyr.