Almatyda balasyna durys tárbıe bermegen 539 ata-ana jazalandy

ALMATY. QazAqparat - Almatyda 400-ge jýyq jasóspirim jáne 580-den astam turmysy nashar otbasy polıtseılerdiń esebinde tur. Bul týraly óńirlik kommýnıkatsııalar qyzmeti brıfınginde Almaty qalalyq polıtsııa departamentiniń jergilikti polıtsııa qyzmeti basqarmasynyń ıývenaldy polıtsııa bóliminiń basshysy, polıtsııa podpolkovnıgi Janna Shonjanova aıtty, dep habarlaıdy QazAqparat tilshisi.

Spıkerdiń aıtýynsha, Almatyda kámeletke tolmaǵandar isi boıynsha 230 polıtsııa ınspektory qyzmet etedi.

«Bıyl jedel profılaktıkalyq is-sharalar sheńberinde 357 jasóspirim, sondaı-aq 380 turmysy nashar otbasy anyqtalyp, polıtsııanyń esebine qoıyldy. Búgingi tańda ishki ister organdarynyń esebinde 393 bala jáne 583 turmysy nashar otbasy tur», - dedi Janna Shonjanova.

Spıker jasóspirimder qylmysynyń negizgi sebepterin atady.

Onyń sózinshe, ata-anasy ishimdikke qumar bolsa, balalaryn baqylaýsyz qaldyrady.

Sondaı-aq, eger bala bos ýaqytynda eshqandaı úıirme, sektsııaǵa qatyspasa jáne quqyqtyq saýatsyzdyǵynan qylmys jasaıtyn kezderi bolady.

Eger ata-analar balasyn qaraýsyz qaldyryp, durys tárbıe bere almasa, onda balalar arnaıy ortalyqqa jiberiledi.

Bul rette jyl basynan beri Almatyda ómirlik qıyn jaǵdaıǵa tap bolǵan 653 jetkinshek balalardy qoldaý ortalyǵyna ornalastyrylǵan.

Janna Shonjanova keıbir jaǵdaılarǵa jasóspirimderdiń ata-anasy jaýapty ekenin aıtty.

Mysaly, kámeletke tolmaǵandardyń oıyn-saýyq oryndarynda (saǵat 22.00-den keıin) jáne túnde úıden tys (saǵat 23.00-den keıin) jerde zańdy ókilinsiz júrgeni úshin 5 640 ata-ana ákimshilik jaýapqa tartylǵan.

«Olar basqa qalada turatyn, Almatyǵa belgili bir maqsatsyz, zańdy ókilinsiz keletin balalar, olar kóbine quqyq buzý sýbektileri men obektilerine aınalady. Anyqtalǵan árbir fakt boıynsha kásipkerlik sýbektileri retinde mekeme ıeleri sekildi, ata-analar da ákimshilik jaýapqa tartylady», - dedi spıker.

Osy kezeńde komıssııa otyrystarynda kámeletke tolmaǵandarǵa qatysty túrli faktiler boıynsha 250 materıal qaraldy.

Nátıjesinde 23 adam ata-ana quqyǵynan aıyryldy.

539 ata-ana bala tárbıesine qatysty mindetterdi durys oryndamaǵany úshin ákimshilik jaýapqa tartylǵan.