Almatyda balalar jazýshylary arasynda «Daraboz» baıqaýynyń jeńimpazdary belgili boldy (FOTO)
Qazylar alqasynyń tańdaýy boıynsha baıqaýdyń Gran-prı júldesi men 1 mln teńge syıaqysyn jazýshy Salyqbaı Ábildabek jeńip aldy. Birinshi oryn jáne 700 myń teńge Nurbek Nurjanǵa buıyrdy. Ekinshi oryn alǵan jazýshy Aqylbek Shaıahmetke 500 myń teńge tabys etildi. Úshinshi oryn alǵan Markıza Bazarbaıqyzy 300 myń teńgeni ıelendi.
Sonymen qatar, qazylar alqasy qatysýshylardyń biri - jazýshy Qasteı Baıanbaıulyn «Balalar ádebıetin damytýǵa sińirgen eńbegi úshin» dep atalatyn arnaıy júldesimen marapattady.
Baıqaýdyń jalpy júlde qory - 2 750 000 teńge.
«Daraboz» baıqaýyn biz budan 11 jyl buryn bastap edik. Ony júzege asyrýǵa jazýshy Sháken Kúmisbaev orasan zor úles qosty. 11 jyl ishinde baıqaýǵa qatysýǵa 4 500-ǵa jýyq ótinimder kelip túsipti. Men bul jerde balalar úshin eńbek etip jatqan qatysýshylarymyzǵa sheksiz alǵysymdy bildiremin. Bizdiń jetistikterimiz bir jaǵynan jaqsy jazylǵan kitaptardy oqyǵanymyzǵa baılanysty. Sondyqtan, sizderdiń eńbekterińiz óte mańyzdy eńbekter. Balalar jáne balalar ádebıeti - bul elimizdiń bolashaǵy», - dedi óz sózinde metsenat Baýyrjan Ospanov.
Esterińizge sala ketelik, baıqaýdyń maqsaty - Qazaqstanda balalar ádebıetin damytý jáne ony nasıhattaý.
Ol bıyl kezekti ret 20 sáýirde bastaldy.
Árbir qatysýshy «Daraboz» saıtynyń arnaýly paraqshasyna 20 mamyrǵa deıin tirkelip, óz shyǵarmasyn jiberdi. Baıqaýǵa bıyl 300-ge jýyq qazaq tilindegi eńbekter qabyldandy.
Úzdikterdi qazylar alqasy daýys berý arqyly tańdady.
Ádebı jumystardy saralaý barysynda avtor eńbeginiń ádebı-kórkemdik ereksheligi, mazmuny, jazylý stıli jáne ádepti jazylǵandyǵy qatań qadaǵalandy.
Aıta ketelik, QR ulttyq memlekettik kitap palatasynyń málimeti boıynsha, Qazaqstanda búgingi tańda 1 335 memlekettik jáne jeke baspahanalar bar. Biraq, balalar ádebıetine arnaıy mamandandyrylǵandary shamaly. Sońǵy 11 jyl ishinde elimizde 8 523 kórkem shyǵarma jaryq kórse, solardyń ishinde tek 220 shyǵarma ǵana qazaq tilindegi balalar ádebıetine arnalǵan.