Almatyda balalar lagerindegi oqıǵaǵa jaýaptylar jazalanady
Monıtorıng barysynda Qonaev qalasyndaǵy Jellyfish jáne Qarasaı aýdanyndaǵy «Órnek» lagerleri tekserildi. Osydan soń jýrnalısterge bergen suhbatynda Oqý-aǵartý mınıstrligine qarasty Balalardyń quqyqtaryn qorǵaý komıtetiniń tóraǵasy Nasymjan Ospanova eki lager de sanepıdem ortalyǵy men qaýipsizdik talaptaryna sáıkes keletinin aıtty.
«Men qaýipsizdik júıesine, beınekameralarǵa, olardyń jedel basqarý ortalyǵyna qosylǵanyna, kúzettiń bolýyna, kúzetshige qajetti elementterdiń bolýyna nazar aýdardym. Olardyń barlyǵy lagerlerde bar», - dedi Nasymjan Ospanova.
Ol «Bel Rıchı» JShS («Arman Dala») lagerinde balalarmen bolǵan keleńsiz oqıǵaǵa qatysty adamnyń barlyǵy jaýapqa tartylatynyn jetkizdi.
«Moratorıı bolsa da, kelisimshart jasasqan soń, kásipkerlik nysanyna baryp, onda balalardyń qaýipsiz jaǵdaıda ekenine kóz jetkizý kerek edi. Men ol protsess bolmaǵan dep oılaımyn. Ony qalalyq Bilim basqarmasy da moıyndady. Sol sebepti biz oǵan kináli adamdardyń belgili bir jazaǵa tartylǵanyn durys dep sanaımyz. Qazir qyzmettik tekseris júrgizilip jatyr.
Bizdiń komıtet osy jumystardy baqylaý úshin keldi. Sizderdi sendirgim keledi, balalardyń jazǵy demalysyn sapaly uıymdastyrýǵa jaýapty ári mindetti bolǵan jaýapty tulǵanyń barlyǵy jazalanady. Komıtet ony óz baqylaýyna aldy», - dedi Oqý-aǵartý mınıstrligine qarasty Balalardyń quqyqtaryn qorǵaý komıtetiniń tóraǵasy Nasymjan Ospanova.
Almaty qalalyq Bilim basqarmasynyń basshysy Lázzat Jylqybaeva «Arman Dala» lagerin jaýapqa tartý úshin tıisti qujattardy sotqa daıyndap jatqanyn aıtty.
«Almatyda 214 memlekettik mektep bar, onda úsh myńnan astam bala bilim alady. Almaty qalasynyń ákimdigi jyl saıyn balalardyń jazǵy saýyqtyrý ortalyqtarynda demalýǵa qarjy bólip otyrady. Bıyl 377 mıllıon teńge bólingen. Bul rette qalalyq Bilim basqarmasyna qarasty «Órnek» lageri jalǵyz memlekettik lager bolyp sanalady.
Ol úsh myń balany qamtamasyz ete almaǵan soń, Bilim basqarmasy qosymsha konkýrs oınatyp, jekemenshik lagerlerdiń konkýrsqa qatysýyna jol berdi. Osy konkýrstyń nátıjesinde utyp shyqqan «Bel Rıchı» kompanııasynyń «Arman Dala» lagerin ózderińiz bilesizder. Ókinishke qaraı, olar óz mindetterin durys oryndamady, sol úshin olardy jaýapqa tartý úshin tıisti qujattardy sotqa daıyndap jatyrmyz.
Konkýrsqa qatysqan kezde olar barlyq qujat konkýrsqa saı, sanepıdem ortalyqtyń qortyndysy bar, órt qaýipsizdigi, basqa da qaýipsizdik organdary beretin qortyndylar qujattarynda kórsetilgen edi. Biraq is júzinde lager talapqa saı bolmady. Keleńsiz jaǵdaıǵa baılanysty biz olardyń qujattaryn keri qaıtardyq. Bul lagerge memleket jáne basqarma tarapynan birde-bir tıyn tólengen joq. Kelisim jasaldy, alaıda keıin kelisim buzýǵa berildi», - Lázzat Jylqybaeva.
Onyń aıtýynsha, «Arman Dala» lagerine demalysqa barǵan 300 bala endi qosymsha demalyspen qamtamasyz etiledi.
«Biz konkýrstan utyp shyqqan lagerlerdiń qujattaryn qarap, tekserip, ata-analardyń suranysyna sáıkes basqa lagerlerge jiberemiz. Biz «Arman Dala» lagerinen soń «Taý Samaly» lagerin de baryp kórdik. Ol lager talapqa saı bolmaǵan soń onymen kelisimshartty buzdyq. Olardyń da qujattaryn sotqa jiberemiz. Sebebi lager ornalasqan jer qujatta kórsetilgen mekenjaıǵa saı emes bolyp shyqty. Sondyqtan naqty qujatta kórsetilmegen lager talapqa saı emes bolyp sanalady.
Ol jerde birinshi kezekte 50 bala, al «Arman Dalaǵa» bir kezekte 350 bala demalý kerek bolatyn», - dedi qalalyq Bilim basqarmasynyń basshysy Lázzat Jylqybaeva.
Eske salaıyq, buǵan deıin almatylyq oqýshylardyń demalýǵa jazǵy lagerge emes, saýnaǵa jiberilgenin habarlaǵanbyz.
Almaty prokýratýrasy saýna ǵımaratynda balalar lagerin uıymdastyrý isi boıynsha tergeýdi bastady. Keıin depýtattar saýnadan balalar lagerin ashqan kásipker utyp alǵan tenderdiń quny 107 mln teńge ekenine kóz jetkizdi.