Almatyda balalar koronavırýsty jıi juqtyra bastady

ALMATY. QazAqparat – Almatyda balalar koronavırýsty jıi juqtyra bastady. Bul týraly qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova onlaın brıfıng barysynda málim etti, dep habarlaıdy QazAqparat tilshisi.

Onyń aıtýynsha, 1 jasqa deıingi balalar arasynda ınfektsııa anyqtalǵandar sany azaıdy, alaıda balalar arasynda olardyń úlesi – 22,8%.

«Ótken aptada 14 jasqa deıingi balalar arasynda juqtyrýdyń aıtarlyqtaı ósýi tirkeldi - 5,4%-ǵa (1 463-ten 1 920-ǵa deıin) jáne jasóspirimder – 1%-ǵa (388-den 589-ǵa deıin), sondaı-aq 60 jastan asqan adamdar-3%-ǵa (2 530-dan 3 262-ge deıin). Bir jasqa deıingi balalar arasynda, kerisinshe, 450-den 438 jaǵdaıǵa deıin, sál tómendegeni baıqalady, biraq olardyń úlesi barlyq balalar arasynda aıtarlyqtaı – 22,8%», - dep atap ótti spıker.

Sonymen qatar, ol megapolıste «omıkron» shtamynyń 7 jaǵdaıy anyqtalǵanyn tilge tıek etti.

«Almaty qalasynyń sanıtarlyq-epıdemıologııalyq baqylaý departamenti sekvenırleý jeltoqsannyń sońy – qańtardyń basynda júrgizilgenin habarlaǵan bolatyn. «Omıkron» shtamynyń 7 jaǵdaıy anyqtaldy. Jeti naýqastyń arasynda 14 jasqa deıingi balalar joq. Tolyq genomdyq zertteý júrip jatyr, biraq atalǵan jeti jaǵdaıdan basqasy teris nátıje kórsetti. Zerthanalyq zertteýler júrgizilip jatyr», - dedi Ásel Qalyqova.