Almatyda balabaqshanyń keıbir tólemin bıýjet esebinen júrgizý pysyqtalýda
Memlekettik mektepke deıingi mekeme basshylarynyń qatysýymen ótken keńeste balabaqshalardaǵy oryn tapshylyǵyn azaıtý, balalardy tamaqtandyrýdyń jáne densaýlyq jaǵdaılaryn medıtsınalyq baqylaýdyń sapasyn arttyrý, mektepke deıingi bilim berý ári tárbıeleý úrdisterin, ákimshilik tarapynan menedjementti jaqsartý, sybaılastyq táýekelderine qarsy is-qımyl júrgizý máseleleri qaraldy.
Búgingi kúni Almatyda 824 mektepke deıingi uıym bar, onyń 189-y memlekettik, oǵan 65 myńnan asa bala barady. 3 jastan 6 jasqa deıingi balalardy qamtý shamamen 90%-dy quraıdy.
Balabaqshalarda oryn tapshylyǵyn azaıtý maqsatynda 640 oryndy tórt memlekettik balabaqshanyń qurylysy júrýde. Sonymen birge, jergilikti bıýdjettiń qarjysy esebinen jeke balabaqshalardaǵy ata-analardyń tólemderin ishinara óteý tetikteri pysyqtalýda. Bul qosymsha 5 myń oryn qurýǵa múmkindik beredi. Taǵy 2,2 myń oryndy qoldanystaǵy nysandardy qaıtarý nemese jańartý arqyly ashý josparlanyp otyr.
Keńeste balabaqshalar basshylarynyń jaýapkershiligin kúsheıtýge erekshe nazar aýdarý kerektigi sóz boldy. Ásirese, qarjy tártibin saqtaý óte mańyzdy, óıtkeni mektepke deıingi bilim berý salasyna bólinetin qarjy kólemi ósti. Sonymen birge, balabaqsha meńgerýshileri bilim berý protsesiniń joǵary mazmundyq sapasyn qamtamasyz etip, qosymsha sabaqtar ótkizýdi engizýleri tıis.
Kún tártibindegi ózekti máseleniń biri – balalar taǵamynyń sapasyn arttyrý jáne qaýipsizdik sharalaryn kúsheıtý. Baqylaýdy kúsheıtý úshin beınebaqylaý júıesi keńinen engizilip, «soqyr aımaqtar» jabylýda.
Koronavırýstyq pandemııa jaǵdaıynda sanıtarlyq-epıdemıologııalyq qaýipsizdik normalaryn saqtaýǵa erekshe nazar aýdarylady. Sanıtarlyq dárigerler sanıtarlyq qaýipsizdik erejeleriniń belgilengen tártibiniń saqtalýyn anyqtaý úshin turaqty monıtorıng júrgizedi.
Almaty ákimi Baqytjan Saǵyntaev qarjylyq tártipke baqylaýdy kúsheıtýdi jáne menedjmentti kúsheıtý boıynsha sharalar qabyldaýdy tapsyrdy. Budan bylaı balabaqsha meńgerýshileriniń jumysy iske asyrylǵan KPI arqyly baǵalanatyn bolady. Budan ózge, qamqorshylyq keńesteriniń quramy qaıta qaralady, olardyń quramynda belsendi ómirlik ustanymdary bar ata-analar bolýlary tıis.