Almatyda baǵany turaqtandyrýǵa 15 mlrd teńge bólindi
«Baǵany turaqtandyrý úshin áleýmettik mańyzy bar azyq-túlik taýarlarynyń tizbesine 15 mlrd teńge bólindi. «Magným» jelisiniń sórelerinde baǵalardy, sondaı-aq áleýmettik nan jáne jumyrtqa óndirýshileriniń satý baǵalaryn turaqtandyrý júrgizilip otyr»,- dedi spıker.
Sonymen qatar, maýsymaralyq kezeńde kókónis baǵasyn turaqtandyrý úshin 20 myń tonnaǵa jýyq kókónisti aldyn ala «forvardtyq» túrde satyp alyndy. Sondaı-aq Pavlodar oblysynyń óndirýshisinen 4 myń tonna kartop pen 1 myń tonna sábiz satyp alý josparlanyp otyr.
«Budan basqa, 2023 jylǵy sáýir-maýsym aılary kezeńinde eldiń ońtústik óńirlerinen, Ózbekstan, Pákistan jáne Irannan erte pisetin kókónisterdi jetkizý uıymdastyrylatyn bolady. Búgingi tańda bul másele QR Aýyl sharýashylyǵy, saýda jáne ıntegratsııa mınıstrlikterimen birlesip pysyqtalýda»,- dedi Almaty ákiminiń orynbasary.
Spıkerdiń sózinshe, Úkimet qant salasyn damytý jónindegi baǵdarlamany qabyldady, soǵan sáıkes Almaty QR Saýda jáne ıntegratsııa mınıstrligimen birlesip, belgilengen baǵamen 5,7 myń tonna ónim jetkizý úshin «Aqsýqant» qant zaýytyna 2,6 mlrd teńge bólý máselesin pysyqtady. Sonymen qatar, kúrish, qaraqumyq jarmasy, kúnbaǵys maıy jáne kókónis ónimderin satyp alýǵa 3,8 mlrd teńge rezervke qoıyldy.
«Baǵany turaqtandyrý sharalarymen barlyq 19 áleýmettik mańyzy bar azyq-túlik ónimderi qamtyldy, qol qoıylǵan sharttar men kelisimder sheńberinde óńirlerden 80 myń tonnadan astam ónimdi jetkizý júrgizilýde. 1,5 myń «úı janyndaǵy» dúkenderge 2 myń tonna bakaleıa jáne 2,4 mln jumyrtqa jetkizý uıymdastyryldy. Azyq-túlik emes taýarlardyń 1,2 myń túrin qoımalardan kóterme baǵamen satý júzege asyrylýda»,- dedi Álisher Ábdiqadyrov .
Budan basqa, Almaty oblysynan jáne Qazaqstannyń basqa óńirlerinen jetkizilgen aýyl sharýashylyǵy ónimderiniń keńeıtilgen jármeńkeleri men «demalys kúni» jármeńkeleri ótkizildi.