Almatyda azyq-túlik ónimderi men qurylys materıaldaryn shyǵaratyn 8 joba qolǵa alyndy

ALMATY. QazAqparat – Almaty ındýstrııaldy aımaǵynyń dırektory Ádil Amralın onlaın brıfıng barysynda azyq-túlik ónerkásibi men qurylys materıaldary salasyndaǵy jańa jobalardy iske asyrý týraly aıtty, dep habarlaıdy QazAqparat tilshisi.

Onyń aıtýynsha Biotech Karal kompanııasy úı janýarlaryna arnalǵan bıotamaqty qospalar men tyńaıtqyshtar óndiretin alǵashqy zaýyttyń biri.

«Onyń qurylysy bıyl bastaldy. Birinshi kezeńi 2022 jyly aıaqtalady. Qurylystyń ekinshi kezeńin 2024 jyly aıaqtaý josparlanyp otyr. Jobanyń quny 850 mln teńge. Zaýyt 130 jańa jumys ornyn ashady. Kásiporynnyń qýattylyǵy jylyna 6,7 mln lıtr daıyn ónim shyǵarýdy kózdeıdi»,-deıdi spıker.

Ekinshi zaýyttyń qýattylyǵy jylyna 15 mln lıtr kóleminde alkogolsiz sýsyndar óndiretin ári 50 jumys ornyn ashatyn kásiporyn. Joba quny 316 mln teńge. 2024 jylǵa qaraı jarty gektar ýchaskede zaýyt salynady, ol jylyna 500 mln teńgege ónim óndiredi.

Úshinshi nysan – avtoklavty gazobloktar men qurylys materıaldaryn shyǵaratyn zaýyt qurylysy. Bul kompanııa K7 Group holdınginiń quramyna kiredi ári Batys Qazaqstannyń jyljymaıtyn múlik naryǵynyń ókili. Almatydaǵy zaýyt alıýmınıı vıtrajdaryn, plastıkalyq terezelerdi, avtoklavty gazobloktardy, vıtrajdardy shyǵarady.

«Kompanııa elektr energetıkasy salasyndaǵy jobalardy iske asyrýmen aınalysady, ındýstrııaldy aımaqtaǵy zaýyt kabel-ótkizgish ónimderdiń 500-ge jýyq túrin óndiretin bolady. Olar kúshtik kabelder, baqylaý kabelderi, montajdaý symdary, SSP symdary. Kásiporynda 120 jumys ornyn qurý josparlanýda», – dedi Ádil Amralın.

Almaty ındýstrıaldy aımaǵynda salynatyn taǵy bir kásiporyn – ol talshyqty jáne kompozıtti talshyqtan jasalǵan armatýra óndirý zaýyty.

Indýstrııaldy aımaq dırektorynyń aıtýynsha, bul qurylys, dızaın, sáýlet jáne ınjenerlik jobalaýdyń úlken tájirıbesi bar otandyq kompanııa. Zaýyt shyny talshyqty, shyny tor, kompozıtsııalyq materıaldan armatýra shyǵarady. 60-qa jýyq jańa jumys ornyn qurý josparda. Investor jobany iske asyrýǵa 1 mlrd teńgeden astam qarjy salmaq.

Sonymen qatar, tizimde nan jáne jartylaı fabrıkattaryn óndiretin kásiporynda bar. Munda jylyna 3,3 myń tonna jartylaı fabrıkat, 10 myń tonnadan astam túrli aspaz ónimderi jáne jylyna 5 myń tonnadan astam naýbaıhana ónimderi óndiriledi.

Indýstrıaldy aımaqta 2023 jylǵa qaraı metall qurylymdary men polıetılen qubyrlaryn shyǵaratyn «Burǵan-2005» ónerkásiptik kesheni salynady.

Qazirgi ýaqytta kompanııa qazandyq, týrbınalyq, elektr tehnıkalyq, hımııalyq jabdyqtarǵa, baqylaý júıesine, avarııaǵa qarsy qorǵaýǵa qyzmet kórsetýmen, qurylys materıaldaryn óndirýmen, kótergish jáne qorshaý konstrýktsııalaryn salýmen aınalysady. Almaty ındýstrıaldy aımaǵynda kompanııa metall qurylymdary men polıetılen qubyr fıtıngterin shyǵaratyn zaýyt salýdy josparlap otyr.

Jobanyń quny - 2 mlrd teńge. 90-ǵa jýyq jumys orny ashylady.

Osylaısha, ındýstrııalyq aımaqtyń 8 jańa jobasy 772 adamdy jumyspen qamtıdy. Jalpy somasy 29,35 mlrd teńgege jeke ınvestıtsııalar tartýǵa múmkindik beredi.