Almatyda azyq-túlik dúkenderiniń jumysyna da karantın talaptary engizildi

ALMATY. QazAqparat - Almatyda azyq túlik dúkenderiniń jumysyna da karantın talaptary engizildi, dep habarlaıdy QazAqparat tilshisi.

Qala ákiminiń birinshi orynbasary Erlan Qojaǵapanovtyń aıtýynsha, 5 adamnan artyq adam jınalǵan saýda oryndary jabylady.

«Bizge qala turǵyndarynan kóp saýaldar kelip jatyr. «Adamdar kóshege, dúkenderge barýǵa bola ma» dep surap jatyr. Azyq-túlikten basqa zat satatyn, qyzmet kórsetetin jerler túgel jabylady. Tek azyq-túlik satatyn dúkender ǵana jumys isteıdi. Olardyń ózine erekshe sanıtarlyq epıdemıologııalyq talaptar engizip jatyrmyz. Dúkenderde 5 adamnan, uzyndyǵy 1,5-2 metrden artyq kezek bolmaýy tıis. Bul qashyqtyq arnaıy syzyqpen belgilenýi kerek. Osy talaptardy oryndamaǵan saýda oryndary mindetti túrde jabylady», - dedi E.Qojaǵapanov.

Onyń aıtýynsha, ashyq aýada jappaı jattyǵý jasaý, oıyn oınaý da adam aǵzasy úshin qaýipti bolmaq.