Almatyda azyq-túlik dúkenderi men dárihanalar ǵana jumys isteıdi

ALMATY. QazAqparat – Almaty ákimdigi qyzmet kórsetý men saýda kásipkerlikterine qoıylǵan shekteýdi keńeıtý týraly sheshim shyǵardy. Bul týraly búgin onlaın brıfıng barysynda qala ákiminiń orynbasary Saparbek Tuıaqbaev aıtty, dep habarlaıdy QazAqparat tilshisi.

«Búginnen bastap biz qyzmet kórsetý jáne saýda salasyndaǵy keıbir kásipkerlik nysandarynyń jumysyna qoıylǵan shekteýdi keńeıtý týraly sheshim shyǵardyq. Munyń aldynda iri saýda oryndary, saýda oıyn saýyq ortalyqtary, sulýlyq salondary, qoǵamdyq tamaqtaný oryndary jabyq bolatyn. Al erteńnen bastap jańa rejim kúshine enedi. ıAǵnı azyq túlik dúkenderi men dárihanadan basqa barlyq nysandar jabylady», - dedi Saparbek Tuıaqbaev.

Onyń aıtýynsha, ákimdik karantın rejimin saqtaýdy barynsha qadaǵalap jatyr. Alaıda quqyqbuzýshylyq derekteri de jeterlik.

Keıbir saýda oryndary ashyq bolsa, keıbirinde qyzmetkerler maskasyz qyzmet kórsetip jatyr.

«Barlyq quqyqbuzýshylyq týraly jazylyp, jarııalanyp jatyr. Olarǵa quqyqtyq baǵa berilýde. Ákimdik kúnde monıtorıng júrgizetin bolady. Aqparat quraldarynda barlyq quqyqbuzýshylyq jaıly jarııalaıtyn bolamyz», - dedi ákimniń orynbasary.

Al qalada dámhana men qoǵamdyq tamaqtaný oryndarynan ádettegideı tamaqty úıge alyp ketýge bolady.

«Erteńnen bastap barlyq azyq-túlik emes saýda oryndarynyń úlken-kishiligine qaramastan qyzmet etýine tyıym salynady. Avtosalon, avtobólshekter saýdasy, gúl satatyn pavılondar da jabylady. Hımııalyq tazalaý, fotosalon, optıka salondary, lombard, jyljymaıtyn múlik boıynsha agenttikter, TQKO túgel jabylady», - dedi sheneýnik.