Almatyda azyq-túlik baǵasyn negizsiz kótergenderge qatań shara qoldanylady

ALMATY. QazAqparat - Almatyda azyq-túlik baǵasyn negizsiz kóteretin kásipkerlerge qatań shara qoldanylady. Bul týraly qala ákimi Baqytjan Saǵyntaev aktıv otyrysynda málimdedi, dep habarlaıdy QazAqparat tilshisi.

Almatyda úı mańyndaǵy saýda dúkenderinde baǵany negizsiz kóterý faktileri bar. Bul týraly málimet qala ákimine kúndelikti kelip túsedi.

«Ózimniń orynbasaryma, kásipkerlik basqarmasy, aýdan ákimderine 15%-dan aspaıtyn saýda ústemesin saqtamaıtyn quqyq buzýshylardy anyqtap, derekterin quzyretti organdarǵa jiberýdi tapsyramyn. Josyqsyz kásipkerlerge qatysty qatań sharalar qabyldap, kún saıyn monıtorıng júrgizý qajet», - dedi Baqytjan Saǵyntaev.

Aıta keteıik, qazirgi ýaqytta Almaty qalasynda 3,5 myńǵa jýyq dúken jumys isteýde.

Ótken aptadan bastap «Almaty» ÁKK» AQ áleýmettik mańyzdy azyq-túrikterdi úı mańyndaǵy dúkenderge jetkize bastady.

Óndirýshilerden 67 tonna ónim (nan, jumyrtqa, kúrish, qant jáne kúnbaǵys maıy) jetkizildi.

Kóterme jetkizilimge tapsyrys [phone] jedel jeli boıynsha qabyldanady.

Sonymen qatar, qazirgi ýaqytta Almaty ındýstrııalyq aımaǵynyń aýmaǵynda qajetti ınfraqurylym qurýǵa múmkindik beretin taratý ortalyǵynyń qurylysy jobalanyp otyr.

Áleýmettik mańyzy bar azyq-túlik taýarlarynyń baǵasyn turaqtandyrý aıasynda kásipkerlik jáne ınvestıtsııalar basqarmasy saýda jelilerine «aınalym» jeńildikti qaryz bólý boıynsha jumys júrgizýde.

Bólingen qarajat esebinen «Magným» jelisinde ÁMAT-tyń barlyq 19 ataýy tómen baǵamen jáne «Toımart» jelisinde 12 ÁMAT (un, nan, makaron, kúrish, taýyq eti, aıran, súzbe, sary maı, tuz, kúnbaǵys maıy, kartop, pııaz) satylýda.

Ortasha alǵanda, eki jelide kókónisterdiń (kartop, sábiz, pııaz, qyryqqabat) baǵasy naryqtyq baǵadan 30-50%-ǵa tómen, et ónimderi (sıyr eti, taýyq eti, jumyrtqa) 10-15%-ǵa, azyq-túlik 10-30%-ǵa tómen.

«Almatynan» JShS-men nannyń baǵasyn 85 tg/bólke, 1,8 myń tonna kúnbaǵys maıyn 585 tg/shólmekke jáne 700 tonna qaraqumyq jarmasyn 500 tg/kg («Standart Prodakts» JShS) qalanyń saýda jelilerine jetkizý boıynsha memorandým jasaldy.

7 azyq-túlik bazarynda kókónis jáne bakaleıa ónimderi bazar baǵasynan 1,5-2 ese tómen baǵamen satylady.

«Et dúkenderi» 5 bazarda iske qosyldy. Onda sıyr eti 2050 tg/kg (naryqtyq baǵadan 20% tómen) satylady.

Pavlodar (barlyǵy 6,5 myń tonna kartop pen sábiz), Almaty (250 tonna qyryqqabat) jáne Jambyl oblystarynan (1,5 myń tonna pııaz) kókónis tikeleı jetkizildi.