Almatyda azyq-túlik baǵasy sharyqtap ketpes úshin ne istelip jatyr

ALMATY. QazAqparat - Almatyda áleýmettik mańyzy bar azyq-túliktiń baǵasyn ustap turý sharalary qalaı júrip jatyr? Bul suraqqa qalalyq ákimdik jaýap berdi, dep habarlaıdy QazAqparat.

Vedomstvo taratqan málimetke sensek, aınalym qaryzy aıasynda «Magným» jáne «Toımart» saýda jelilerine, «Alsad» jumyrtqa óndirý zaýytyna, «Asyl Et» sıyr etin óndirýshilerge jeńildikti qaryz berilgen.

Olardyń sórelerinde ÁMAT-tyń 19 túrli taýarynyń 36,5 myń tonnasyna baǵa belgilengen.

Qazirgi ýaqytta «Toımart» saýda jelisimen qaryz shartyn uzartý pysyqtalyp jatyr.

Budan bólek, maýsymaralyq kezeńde baǵany turaqtandyrý úshin 2021 jylǵy qyrkúıekten 2022 jylǵy sáýirge deıin «forvardtyq» satyp alý sheńberinde «Magným» saýda jelisinde 22 myń tonna kókónis satylyp jatyr.

«Toımart» jelisinde 30 sáýirge deıin 380 tonna kartop, sondaı-aq 300 tonna pııaz belgilengen baǵamen satylady.

Qalanyń 7 negizgi bazarynda («Kók bazar», «Jańa Aqbulaq» kóterme saýda kesheni, «Sary-Arqa», «Tastaq», «Taýsamaly», «Almaty-1», «Túrksib» jármeńkesi) «áleýmettik dúkender» jumys isteıdi.

Onda ÁMAT-tyń 10 taýary (kartop, sábiz, pııaz jáne qyryqqabat, qant, qaraqumyq jarmasy, kúnbaǵys maıy, kúrish, múıiz, un) tómendetilgen baǵamen satylady, bul satýshylar arasynda básekelestik orta qalyptastyrady.