Almatyda Ázirbaıjan Mámbetov jaıly kitaptyń tusaýkeseri ótti
Kitaptyń avtory - jýrnalıst jáne jazýshy Nazym Saparova. Shara onlaın formatta ótti.
«Kitap jazý jumysy tórt jyl buryn bastalǵan. Jazýǵa, derekterdi tekserýge, suhbat alýǵa úsh jyl ýaqyt ketti. Bul men úshin erekshe kitap boldy. Bul - áńgime janryndaǵy baıandaý. Men onyń ómirin negizge aldym. Onyń qalaı dúnıege kelgenin, otbasy, ekinshi dúnıejúzilik soǵystan qalaı aman-esen oralǵany, balalar úıine qalaı tap bolǵany, horeografııalyq ýchılışesindegi kezi jáne qalaı rejısser bolýǵa sheshim qabyldaǵanyn jazdym», - deıdi jazýshy.
Onyń aıtýynsha, Ázirbaıjan Mámbetovtiń ónerge degen qushtarlyǵy 12 jasynda oıanǵan. Ol Sháken Aımanovtyń «Altyn múıiz» fılminde oınady.
«Osy kartınadan keıin ol rejısser bolamyn dep sheshedi. Onyń armany oryndaldy. Ol - aldyna úlken maqsat qoıǵan adam. Jetim bala ómiriniń sońynda «Halyq qaharmany» atanady, bul - eń joǵarǵy marapat. Ol halyqynyń súıispenshiligine bólene bildi. Adamdardyń ol kisini qalaı qurmetteıtiniń óz kózimmen kórgenmin. Tiri bolsa, kóptegen shedevr jasaıtyn edi», - dep atap ótti avtor.
Sonymen qatar, Nazym Saparova bul kitapty jazý kezinde biraz qıyndyqtar bolǵanyn aıtty.
«Ókinishke qaraı, men onyń fılmderin kóre almadym, óıtkeni olar burynyraqta túsirilgen. Ol úshin arhıvke kirý kerek boldy. Internetten tapqanym - bul basqa másele. Desek te, keı kartınalaryn kórip shyqtym. Atap aıtar bolsam, «Qan men ter» jáne «Jaýshy» kınosy. Men oqyrmanǵa onyń shynaıy ómirdegi jolyn kórsetkim keldi», - deıdi avtor.
Sonymen qatar, is-sharaǵa avtordyń áriptesteri men synyptastary qatysty. Olar da óz oıyn ortaǵa saldy.
«Men kitapty qýana-qýana oqyp shyqtym. Kitap óte obektıvti, áserli bolyp shyǵypty. Bálkim avtordyń óziniń osy adamǵa degen áserli kózqarasy bolǵandyqtan shyǵar. Nazym únemi ol kisini «bizdiń ákemiz» dep sóıleıdi. Men úshin bul - úlgi-ónege. Shyn máninde Qazaqstanda aqsaqaldarǵa degen qurmet erekshe», - deıdi avtordyń kýrstasy jáne QazUÝ oqytýshysy Larısa Noda.
Nazym Saparova kitapty Almatydaǵy kitap dúkenderinen jáne Facebook arqyly habarlasyp tapsyrys berip satyp alýǵa bolatynyn aıtty.
Sondaı-aq kitap bıyl qazaq tilinde shyǵady.
Qazaq sahna ónerin álemdik deńgeıge kóterip, keńestik dáýirde-aq óziniń darynymen qazaq teatrynyń mártebesin aspandatqan, sahnalyq sheshimderiniń tereńdigimen jańashyl rejısser atanǵan óner tarlandarynyń biri Ázirbaıjan Mámbetov 2009 jyly 78 jasyna qaraǵan shaǵynda dúnıeden ozdy.
Á.Mámbetov «Otan», «Eńbek Qyzyl Tý», «Halyqtar dostyǵy» orden- medaldarymen marapattalǵan.
KSRO jáne Qazaqstannyń memlekettik syılyǵynyń laýreaty, KSRO jáne Qazaqstannyń halyq ártisi atanǵan. Nur-Sultan qalasynyń qurmetti azamaty.