Almatyda az qamtylǵan bes myń otbasyna azyq-túlik taratylady
Bul aktsııanyń maqsaty – turymysy tómen 5 myń otbasyna azyq-túlik salynǵan sebetterdi taratý. Aıta ketý kerek qorjynnyń salmaǵy 51 keli. Onda qaraqumyq, kúrish, un, qant, táttiler, konservilengen et ónimderi, qoıýlandyrylǵan sút, makaron, maı, shaı bar.
Azyq-túlik tartý barysynda kópbalaly analardyń birine «Kúmis alqa» medali tabystaldy. Ol alty bala tárbıelep otyr.
«Qoldaý kórsetip jatyr, alǵysym sheksiz. Osyndaı qıyn ýaqytta ákimdik pen Nur Otan bizdi qaraýsyz qaldyrmaıdy. Azyq-túlikpen qamtamasyz etýde. Búgin mine medal aldym. Óte qýanyshtymyn», - deıdi kópbalaly ana Rysgúl Dáýlet.
Aktsııany «Qazaqstan volonterler lıgasy» QQ Almaty fılıaly, qalalyq áleýmettik ál-aýqat basqarmasy, «Halyq» qoǵamdyq qory birlesip uıymdastyrdy.
«Qala ákimdigi tótenshe jaǵdaı jarııalaǵan sátten bastap 14 myń jaǵdaıy tómen otbasyna azyq-túlik túrinde áleýmettik kómek kórsetildi. Ár sebette 22 keli tartatyn qajetti zattar boldy. Kóptegen jeke kásipkerler kómekke keldi. Olar 15 myń kelige jýyq kókónis pen 800 qap un berdi. Memlekettik aktıvter basqarmasy qoldaý men kómekke zárý otbasylarǵa 1 myń aıaq kıim bóldi», - dedi Almaty qalasy áleýmettik ál-aýqat basqarmasynyń bólim basshysy Rahılıam Mahpırova.
«Qazaqstan volonterler lıgasy» qoǵamdyq qorynyń Almaty qalalyq fılıalynyń tóraǵasy Baǵdat Anarbaeva jergilikti atqarýshy organdar men qorlarǵa belsendi túrde kómek kórsetip jatqandaryn aıtty.
«Bizdiń mindetimiz - bul ónimderdi jınap, daıyndap, keıin olardy meken jaılarǵa baılanyssyz jetkizý. Bul jumystarǵa kún saıyn 30-50 erikti jumyldyrylady. Ár topta 3-4 adamnan bar», - dedi ol.