Almatyda aımaqtyq halyqaralyq valıýta qorynyń ortalyǵy paıda bolady

ALMATY. QazAqparat – Halyqaralyq valıýta qorynyń basqarýshy dırektory Krıstalına Georgıeva men Qazaqstan Ulttyq bankiniń tóraǵasy Erbolat Dosaev onlaın rásim barysynda aımaqtyq ortalyqty Almatyda ashý týraly kelisim hatqa qol qoıdy, dep habarlaıdy QazAqparat tilshisi.

Ulttyq banktiń keltirgen málimetinshe, qazir álemde osyndaı aımaqtyq 16 ortalyq jumys isteıdi, sońǵysy Qytaıda 2018 jyly ashylǵan. Qazaqstandaǵy aımaqtyq ortalyq óńirde birinshi jáne halyqaralyq valıýta qorynyń adam áleýetin damytý boıynsha 17- shi ortalyq bolmaq.

«Ortalyqty qurýdaǵy maqsat – aımaqta áleýetti damytý jónindegi qyzmetti úılestirý jáne iske asyrý. Sondaı-aq 9 elmen (Qazaqstan, Armenııa, Ázerbaıjan, Grýzııa, Qyrǵyz Respýblıkasy, Mońǵolııa, Tájikstan, Túrikmenstan jáne Ózbekstan) jáne túrli qarjy ınstıtýttarymen ózara is-qımyl jasaý.Aımaqtyq ortalyq tehnıkalyq kómek kórsetý jáne vorkshoptar men semınarlar ótkizý jolymen makroekonomıkalyq jáne qarjylyq, aqsha-kredıt saıasaty, qarjy sektoryndaǵy retteý men qadaǵalaý, statıstıka, qurylymdyq reformalardy ázirleý máselelerinde óńirdiń áleýetin damytýǵa shoǵyrlanady»,– dep habarlady bankten.

Atalǵan ortalyqty qurý – aımaqtyń kásibı damýy men jalpy yntymaqtastyqqa negiz bolatyn sapaly adam kapıtalyna salynǵan ınvestıtsııa. Ortalyqtyń jumysy kásibı tájirıbe almasýdy tereńdetýge jáne óńirlik yntymaqtastyqty nyǵaıtýǵa yqpal etetin bolady.

Halyqaralyq valıýta qoryn Qazaqstanda aımaqtyq ortalyqty ornalastyrý týraly sheshim Qazaqstan, Ózbekstan men Grýzııanyń ótinimderin qarastyrǵannan keıin 2019 jyly qazan aıynda qabyldaǵan.