Almatyda Aıdyn Aıymbetov №92-shi mamandandyrylǵan lıtseı oqýshylarynyń shyǵarmashylyq jumystarymen tanysty (FOTO, VIDEO)

ALMATY. QazAqparat - Almatyda qazaqtyń úshinshi ǵaryshkeri, Halyq qaharmany, «Qazaqstan ǵarysh sapary» ulttyq kompanııasynyń vıtse-prezıdenti Aıdyn Aıymbetov pen Qonaev atyndaǵy Eýrazııalyq zań akademııasynyń rektory Ómiráli Jalaırı Mahatma Gandı atyndaǵy №92-shi mamandandyrylǵan lıtseıde qonaqta boldy.

Lıtseı dırektory Erulan Jıenbaevtyń «QazAqparat» tilshisine habarlaýynsha, kezdesý barysynda qonaqtar lıtseı oqýshylarynyń shyǵarmashylyq jumystarymen tanysty.

Ásirese, mektep bazasynda ósimdik zııankesterimen bıologııalyq jolmen kúresýdi zerthanalyq jaǵdaıda zertteý júrgizip jatqan «Bıozertteýshiler» tobynyń jumysy qonaqtardy erekshe qyzyqtyrǵan.

Almaty qalasyna syrttan jetkiziletin jemis pen kókónis quramyndaǵy S dárýmenderi men nıtrattardy anyqtaý jumystarymen, sondaı-aq zerthanalyq jaǵdaıda lastanǵan sýdy hımııalyq jolmen tazartýdy qolǵa alǵan «Jas hımıkter» toby da óz jumystary týraly baıandady.

Al «OMIX» robot tehnıkasy klýbynyń músheleri bolsa ózderi qurastyrǵan temperatýra jáne ylǵaldylyq datchıkteri arqyly órt jaǵdaıyn anyqtaıtyn órt sóndirýshi robotty, arduino baǵdarlamasy arqyly qashyqtyqtan basqarylatyn «Lýnohod» sııaqty jańa robot túrlerin kórsetti.

Klýb jumystarymen tanysqannan keıin májilis zalynda 8-shi jáne 10-shy synyp oqýshylary qonaqtardy reseılik professor Vladımır Jdanovtyń Beıts teorııasy negizindegi kóz jattyǵýlary ǵylymı jobasymen tanystyrdy.

Osy oqý jylynda Reseı Federatsııasynyń Týapse qalasyndaǵy «Orlenok» Búkilreseılik balalar lageriniń bazasynda uıymdastyrylǵan «Ǵaryshtyń biriktirýimen» atty halyqaralyq aeroǵaryshtyq aýysym sharasyna qatysyp kelgen lıtseı oqýshylary óz áserlerimen bólisti.

Sondaı-aq, lıtseıdegi «RadioLAB» klýbynyń músheleri Aıdyn Aqanulyna ujymdyq radıostansa qurý barysyndaǵy jumystaryn kórsetip, ǵaryshker aǵalarynyń úlken rızashylyǵy men «tamasha» degen baǵasyn aldy.

Sonymen qatar klýb músheleri lıtseıdiń ÝQT (ýltraqysqa tolqyn) transıveri arqyly Almaty qalasynyń

UN6GDL, UN6GL, UN8QEY radıoáýesqoılarymen radıobaılanys ornatyp qonaqtardy tań qaldyrdy.

(https://www.youtube.com/watch?v=-lzaapHwBkw&feature=youtu.be)

Kezdesý sońyna qaraı Aıdyn Aqanuly ustazdar men oqýshylardyń suraqtaryna jaýap berip, lıtseı bazasynda tanysqan ǵylymı jobalarǵa baılanysty óz oıyn bildirdi.

Kezdesý sońy kontserttik baǵdarlamaǵa ulasty.