Almatyda «Aıaýly ana» atty shyǵarmashylyq baıqaý ótti

ALMATY. 30 qarasha. QazAqparat - Almatyda QR Tuńǵysh Prezıdenti kúni qarsańynda Qazaq ulttyq agrarlyq ýnıversıtetinde Medeý aýdandyq ákimdigi janyndaǵy áıelder isi jáne otbasy demografııalyq saıasat jónindegi komıssııa men Qazaq ulttyq agrarlyq ýnıversıtetiniń uıymdastyrýymen «Aıaýly ana» atty shyǵarmashylyq baıqaýy bolyp ótti.

Oǵan ýnıversıtet oqytýshylary men stýdentteri, belgili qoǵam qaıratkerleri jáne óner sańlaqtary qatysty. Bul sharada Sara Dostıhýnova sııaqty kóp balaly analarǵa «Altyn alqa» belgileri tapsyrylyp, túrli atalymdar boıynsha baıqaý jeńimpazdary marapattaldy. Atap aıtqanda múmkindigi shekteýli balalardy tárbıelegen analar arasynan Saltanat Qablaqatova birinshi, Naǵılııa Baıbaǵysova ekinshi, Kamshat Abaı úshinshi orynǵa ıe boldy. Al kópbalaly analar arasynan Saltanat Abıyrova, Raıa Lesova, Merýert Barjaqsıevalar 1-3 oryndardy ózara bólisti. Olardyń qurmetine áıgil ánshi Sara Tynyshtyǵulova jáne Qazaq ulttyq agrarlyq ýnıversıtetiniń «Gúl-Baný» bı ansambliniń bıshileri men Qýat Imanov, Murat Rysqulov, Ydyrys Sıdahmet sııaqty basqa da ónerpazdar óner kórsetti.