Almatyda avtokólik ıelerine arnalǵan halyqqa qyzmet kórsetý ortalyǵy jabyldy

ALMATY. QazAqparat - Almaty qalasyndaǵy №3 mamandandyrylǵan halyqqa qyzmet kórsetý ortalyǵy óz jumysyn toqtatty, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy KEAQ Almaty qalasy boıynsha fılıalynyń málimetinshe, bıylǵy 19 qyrkúıekten bastap Almaty qalasy, Serikov kóshesi, 2a mekenjaıynda ornalasqan №3 mamandandyrylǵan HQO bólimi jumysyn toqtatty.

«Qulager» shaǵyn aýdanynyń №3 mamandandyrylǵan bólimge qyzmet alýshylar az keledi. Kóbinese avtokólik ıeleri qyzmet alý úshin №1, №2, №5 jáne №6 bólimderge júginedi nemese qyzmetterdi ekinshi deńgeıdegi bankterdiń qosymshalary arqyly onlaın alady. Aýdan turǵyndarynyń tarapynan avtokólikke qatysty qyzmetterge suranystyń bolmaýy sebepti bólim jumysyn toqtatýǵa sheshim qabyldandy» - dedi «Azamattarǵa arnalǵan úkimet» memlekettik korporatsııasy» KE AQ Almaty qalasy fılıalynyń dırektory Abdýrasýl Kýldashov.

Osyǵan deıin Almatyda avtokólik ıelerine arnalǵan 5 MHQO jumys istese, endi avtokólik ıeleri qaladaǵy tek 4 MHQO-ǵa júgine alady. Olar №1 mamandandyrylǵan bólim - «Saıaly» shaǵyn aýdany, Aqqaınar kóshesi 1 mekenjaıynda, № 2 mamandandyrylǵan bólim - Maılın kóshesi, 85, № 5 mamandandyrylǵan bólim - Túrksib aýdanyndaǵy «Qaırat» shaǵyn aýdany, Qulja dańǵyly, 9 shaqyrymynda jáne № 6 mamandandyrylǵan bólim - «Kemel» shaǵyn aýdany Aqsýat kóshesi, 118 mekenjaıynda ornalasqan.