Almatyda avtobýs eki adamdy qaǵyp, jaıaý júrginshilerdiń biri oqıǵa ornynda qaza tapty

ALMATY. QazAqparat- Almatyda jolaýshylar avtobýsy jaıaý júrginshiler jolynan ótip bara jatqan eki adamdy qaǵyp ketti, dep habarlaıdy QazAqparat tilshisi.

Onyń vıdeosy áleýmettik jelide paıda boldy.

Almaty qalalyq Polıtsııa departamentiniń málimetinshe, jol apaty 9 qyrkúıek kúni tańǵy saǵat 09:05 shamasynda boldy.

«Jolaýshylar avtobýsynyń júrgizýshisi Abaı dańǵylymen batys baǵytta, Saın kóshesinen batysqa qaraı kele jatyp, jaıaý júrginshiler jolynan ótip bara jatqan eki adamdy qaǵyp ketti. Saldarynan 1958 jyly týǵan er adam oqıǵa ornynda kóz jumdy. Ekinshi jaıaý júrginshi 66 jastaǵy áıel qaladaǵy emdeý mekemeleriniń birine jetkizildi»,- dep habarlady vedomstvodan.

Qalalyq polıtsııanyń baspasóz qyzmeti málim etkendeı, atalǵan oqıǵa QR QK 345-babynyń 3-bólimimen sotqa deıingi tergeý isi reestrinde tirkelip, saraptamalar taǵaıyndaldy.