Almatyda aýlanǵan buralqy ıtter qaıtadan bosatylady

ALMATY. QazAqparat – Almaty qalalyq veterınarlyq qyzmeti «Janýarlarǵa jaýapkershilikpen qaraý týraly» zańnyń aıasynda osyǵan deıin aýlanǵan ıtterdi bosatatynyn málimdedi, dep habarlaıdy QazAqparat tilshisi.

Vedomstvo málimetinshe, endi aýlanǵan janýarlardy óltirýge tyıym salynady. Qaýipti juqpaly aýrýmen aýyratyn jáne negizsiz agressııa tanytatyn janýarlardy ǵana atýǵa ruqsat.

«Bıyl maýsym aıynan bastap aýlanǵan buralqy ıtter tekseristen ótedi. Eger qaýipti aýrý men sebepsiz agressııa baıqalmasa, olarǵa vaktsına salynyp, kastratsııa jasalady. Sodan keıin olar asyrap alǵysy keletinderge beriledi», - dep atap ótti Almaty qalasy veterınarlyq qyzmetiniń mamandary.

Eger eshkim asyrap almasa, qulaqtaryna arnaıy jasyl belgi taǵyp, erkindikke jiberedi.