Almatyda Áýezov aýdanynyń ákimi halyq aldynda esep berdi
Almatyda aýdan ákimderiniń halyqpen esep berý kezdesýleri jalǵasýda. Búgin Áýezov aýdanynyń ákimi Saıran Saıfedenov ótken jyldy qorytyndylap, aýdandy damytý jospary týraly aıtyp, turǵyndardyń suraqtaryna jaýap berdi. Úsh saǵatqa sozylǵan tikeleı efır barysynda aýdan ákimi qalalyqtardyń 65 suraǵyna jaýap berdi.
«Áýezov aýdany — halyq tyǵyz shoǵyrlanǵan aýdan. Sondyqtan da bizdiń barlyq jobalarymyz halyqqa qolaıly orta jasaý úshin jáne jaıaý júrginshiler aımaǵyn damytýǵa baǵyttalǵan», - dedi S.Saıfedenov.
Aýdan turǵyndarynyń usynysy boıynsha «Bıýdjetke qatysý» jobasy aıasynda aýdanda bes joba iske asyryldy. Ótken jyly 205 aýla jóndeldi. Bıyl «Bıýdjetke qatysý» boıynsha jalpy somasy 800 mln teńgege 22 joba josparlanǵan. Sonymen qatar, 2021 jyly «Aqsaı – 2», «Aqsaı – 4» jáne Elemesov kóshelerindegi gúlzarlardy abattandyrý jumystary josparda. «Taýgúl» shaǵyn aýdanynda halyqtyń demalýy men bos ýaqyttaryn ótkizýge arnalǵan oryndardyń joqtyǵyn eskere otyryp, Shalov kóshesiniń boıynda jaıly orta qurý úshin qosymsha jobalyq-smetalyq qujattama ázirlenip jatyr.
Almaty qalasynyń ákimi Baqytjan Saǵyntaevtyń tapsyrmasymen aýdan aýmaǵynda mektepterdegi oqýshylar ornynyń tapshylyǵyn azaıtý boıynsha jumys júrgizilýde. «Mamyr» shaǵyn aýdanynda 1200 orynǵa arnalǵan jańa mektep paıdalanýǵa berildi. №123 mekteptiń 400 orynǵa arnalǵan japsarlas qurylysy aıaqtaldy. 30 memlekettik balabaqshada aǵymdaǵy jóndeý jumystary júrgizildi. 316 orynǵa arnalǵan 9 jekemenshik balabaqsha ashyldy. Sonymen birge, jalpy sany 3600 orynǵa arnalǵan 5 mekteptiń negizgi ǵımarattaryna qosymsha japsarlas qurylys jumystary júrgizilýde. Sondaı-aq, kolledj ben eki bóbekjaıdyń jóndeý jumystaryn aıaqtaý josparda.
« Sonymen qatar, 18-emhanaǵa tirkelgen halyqqa medıtsınalyq qyzmet kórsetý sapasyn jaqsartý úshin bıylǵy jyly «Mamyr» shaǵyn aýdanynda 200 adamnyń kelip qaralýyna arnalǵan dárigerlik ambýlatorııanyń JSQ ázirleý aıaqtalady. Uzyndyǵy 27,9 shaqyrym bolatyn 51 kóshe boıynsha ortasha jóndeý júrgizildi, budan basqa, magıstraldyq kósheler men ótpeli joldar boıynsha jol tósemine aǵymdaǵy jóndeý júrgizildi. Sondaı-aq, «Jumyspen qamtýdyń jol kartasy-2020» baǵdarlamasy aıasynda jaıaý júrginshiler aımaqtary men ótpeli joldardyń asfalt jabynyna aǵymdaǵy jóndeý júrgizildi. Taǵy bir aıta ketetin jáıt, birneshe aýdanda kárizdik júıe olar qurylǵannan beri bolmaǵan. 2020 jyly uzyndyǵy 5,5 km bolatyn 9 kóshede kárizdik júıelerdiń quyrylysy aıaqtaldy. Bul jumystar áli de jalǵasatyn bolady «,- deıdi ákim.
Aýdanda 3 563 kóshe shamdary jańartylyp, 2 543 jańa jaryq núkteleri ornatyldy. Aýdannyń jaryqtandyrylýy 93% quraıdy.
Aýdan aýmaǵynda 260 myń jasyl jelek bar. Ótken jyly 3 myńnan astam kóshet otyrǵyzyldy.
Halyqty jumyspen qamtý maqsatynda aýdanda memlekettik jáne basqa da baǵdarlamalar belsendi júzege asyrylýda. «Jumyspen qamtýdyń jol kartasy» baǵdarlamasy aıasynda Almaty ákimi Baqytjan Saǵyntaevtyń tapsyrmasy boıynsha aýdanda 3500 jumys ornyn qurýmen 44 joba júzege asyryldy. Sondaı-aq, «Bıznestiń jol kartasy-2020» baǵdarlamasy boıynsha 224 adamdy jumysqa ornalastyrýmen 48 joba maquldandy. «Eńbek» baǵdarlamasy aıasynda 7 335 azamat túrli salalarda jumysqa ornalasý múmkindigine ıe boldy. «Bıznes bastaý» jobasy boıynsha 384 adam onlaın oqýdan ótti, onyń 34-i 88,5 mln teńge somasynda granttar aldy.
«Almaty ákimi B. Saǵyntaevtyń tapsyrmasy boıynsha, turǵyndardy áleýmettik qoldaý maqsatynda Áýezov aýdanynda 13 joba iske asyryldy. Osyndaı jobalardyń biri – «ELAB Asia» tsıfrlyq ortalyǵy, ol kóp balaly jáne az qamtylǵan otbasy múshelerine tsıfrlyq tehnologııalar daǵdylaryn zerdeleýdi jáne robototehnıkany meńgerýdi usynady. Aýdanda sondaı-aq «kıiz buıymdar» sheberhanasy jáne az qamtylǵan otbasylardy áleýmettik qoldaý boıynsha «Qarqyn ALA» jobasy jumys isteıdi. Sonymen qatar, «Áleýmettik aspazdyqty» jáne «Áleýmettik tigin tsehyn» júzege asyrý úshin aýdan bazarlarynda 4 tegin oryn berildi»,-dep atap ótti Saıran Saıfedenov.
Turǵyndardy alańdatyp otyrǵan máselelerdiń biri eski jáne apattyq jaǵdaıdaǵy kópqabatty turǵyn úıler. Aýdanda bul sanatqa 94 úı nemese 852 páter jatady.
Búgingi tańda «Eski turǵyn úı» memlekettik baǵdarlamasy aıasynda 1959-1960 jyldary salynǵan 18 kóppáterli turǵyn úı (195 páter) buzyldy. 8 kóppáterli turǵyn úı (754 páter) salyndy. Bıyl taǵy bir úıdi (99 páter) paıdalanýǵa berý josparda. Qosymsha 4 kóppáterli úı (209 páterge) arnalǵan joba ázirlenýde.
Jobany iske asyrý 8 kezekten turady, onyń tetigi turǵyndardy kóshirý jáne eski úılerdi buzý arqyly eski kvartaldardy keshendi qaıta jańartýdy kózdeıdi.