Almatyda aýdan ákimdikterine jańa fýnktsııalar berildi

ALMATY. QazAqparat – 1 sáýirden bastap Almatyda aýdan ákimdikteri joldardy, ınjenerlik jelilerdi aǵymdaǵy jóndeý, halyqtyń osal toptaryna áleýmettik qoldaý kórsetý, mektepke deıingi uıymdardy, shyǵarmashylyq úıirmeler men sport sektsııalaryn jan basyna shaqqandaǵy qarjylandyrý jáne ózge de jumystardy derbes júrgize bastady, dep habarlaıdy QazAqparat tilshisi.

Ákimdik málimetinshe, jańa fýnktsııalarmen qatar segiz aýdan ákimdigine 73,5 mlrd teńgeden astam qarjy bólindi (Alataý – 17 mlrd teńge, Almaly – 5,9 mlrd teńge, Áýezov – 13,3 mlrd teńge, Bostandyq – 7,5 mlrd teńge, Jetisý – 7,9 mlrd teńge, Medeý – 7 mlrd teńge, Naýryzbaı – 5,6 mlrd teńge, Túrksib – 9 mlrd teńge).

«Fýnktsııalardy ortalyqsyzdandyrý boıynsha ózgerister qabyldanǵanǵa deıin aýdan ákimdikteriniń tek aǵymdaǵy jumystarǵa, onyń ishinde abattandyrýǵa, tazalaýǵa, kógaldandyrýǵa jáne t. b. arnalǵan ókilettikteri men qarajattary shekteýli boldy. Aýdan ákimdikterine jańa fýnktsııalardy berý jáne qosymsha qarjylandyrýdy bólý jergilikti jerlerde jedel sheshim qabyldaýǵa yqpal etedi. Ár aýdan halqynyń qajettilikterin negizge ala otyryp, bıýdjet qarajatyn tıimdi bólýdi qamtamasyz etedi jáne osy qyzmetterdiń oryndalýyn odan ári baqylaýǵa múmkindik beredi», - dep habarlady ákimdikte.
Ortalyqsyzdandyrýdy túbegeıli bekitý maqsatynda jergilikti ózin-ózi basqarý fýnktsııalary boıynsha 2022 jylǵy 30 jeltoqsanynda aýdandyq ákimdikterge 15 fýnktsııany berý bóliginde Qazaqstan Respýblıkasynyń Bıýdjet kodeksine túzetýler engizildi:
1) mektepke deıingi tárbıe men oqytý, onyń ishinde mektepke deıingi tárbıe men oqytý uıymdarynyń qyzmetin qamtamasyz etý;
2) sport sektsııalaryn janbasyna shaqqandaǵy normatıvtik qarjylandyrýdy iske asyrý;
3) avtomobıl joldaryn aǵymdaǵy jóndeý;
4) turǵyn úı kómegi;
5) memlekettik ataýly áleýmettik kómek;
6) jergilikti ókildi organdardyń sheshimderi boıynsha muqtaj azamattardyń jekelegen sanattaryna áleýmettik kómek kórsetý;
7) áleýmettik kómek jáne áleýmettik qamsyzdandyrý;
8) belgili bir turǵylyqty jeri joq adamdardy áleýmettik beıimdeý;
9) jetimderdi, ata-anasynyń qamqorlyǵynsyz qalǵan balalardy áleýmettik qamsyzdandyrý
10) múgedektigi bar balalardy qosa alǵanda, qarttar men múgedektigi bar adamdardy áleýmettik qamsyzdandyrý;
11) halyqty jumyspen qamtýdy qamtamasyz etý;
12) memlekettik ataýly áleýmettik kómek;
13) áleýmettik kómek jáne áleýmettik qamsyzdandyrý salasyndaǵy ózge de qyzmetterdi iske asyrý, onyń ishinde memlekettik áleýmettik tapsyrysty ornalastyrý;
14) kommýnaldyq menshiktegi sýmen jabdyqtaý, káriz, káriz sorǵy stantsııalarynyń taratý jelilerin, gazben jabdyqtaý jáne jaryqtandyrýdy jobalaý, salý, rekonstrýktsııalaý, kúrdeli jóndeý jáne modernızatsııalaý;
15) turǵyn úı qoryn ınventarızatsııalaý.
Sondaı-aq ákimdiktiń málimetinshe, ortalyqsyzdandyrý aıasynda aýdan ákimdikterine halyqtyń áleýmettik osal toptaryn áleýmettik qorǵaý bóliginde jumyspen qamtý jáne áleýmettik baǵdarlamalar basqarmasynyń fýnktsııalary berildi.
Aýdan ákimdikterine myna áleýmettik jobalardy iske asyrý boıynsha fýnktsııalar da berildi: Ten qogam, «Baqytty otbasy» ortalyqtary, dástúrli qolóner ortalyǵy, belsendi uzaq ómir súrý ortalyǵy, «Shyńǵa órleý».
Eske salsaq, ótken jyly Almaty ákimdigi jekelegen fýnktsııalardy aýdan ákimdikterine berý týraly bastama kóterip, bul usynysqa Prezıdent qoldaý bildirgen bolatyn.