Almatyda aýdan ákimdiginiń qyzmetkerleri blokposta para alý kúdigine ilikti

NUR-SULTAN. QazAqparat – Almatydaǵy aýdandyq ákimdiktiń eki qyzmetkeri karantın kezinde para alǵany úshin kúdikke ilindi. Bul týraly QR Sybaılas jemqorlyqqa qarsy is-qımyl agenttiginiń apparat basshysy Qýanysh Japaqov málim etti, dep habarlaıdy QazAqparat tilshisi.

«Almaty qalasy boıynsha departament Jetisý aýdany ákimi apparatynyń eki bas mamanyna qatysty QR Qylmystyq kodeksiniń 366-babynyń 3-bóligi boıynsha sotqa deıingi tergeýdi bastady. Olar tótenshe jaǵdaıda jáne belgilengen karantın rejıminde Jetisý aýdanynda ornalasqan tosqaýyl bekettegi kezekshilik kezinde, turaqty túrde Almaty qalasynyń turǵyndarynan qalaǵa kedergisiz kirip-shyǵý úshin 280 myń teńge kóleminde júıeli túrde para alǵany úshin kúdikke ilindi. Sottyń sanktsııasymen kúdiktiler qamaýǵa alyndy», - dedi Japaqov.

Budan bólek ol para alý faktisi boıynsha Almaty qalasyndaǵy Kóliktik baqylaý ınspektsııasy RMM basshysy da kúlikke ilingenin aıtty.

«Almaty qalasy aýmaǵynda tótenshe jaǵdaı kezinde 10 júk kóliginiń kedergisiz júrýi úshin 330 myń teńge kóleminde para alǵan «QR IIDM Komıtetiniń Almaty qalasyndaǵy Kóliktik baqylaý ınspektsııasy» RMM basshysy áshkerelendi. Kúdikti ustalyp, ýaqytsha ustaý ızolıatoryna qamaldy», - dep naqtylady agenttik ókili.