Almatyda «Ashyq» kóshbasshysyna zańsyz aıyppul salyndy

ALMATY. QazAqparat – Almatyda «Ashyq» kóshbasshysy zańsyz ákimshilik jaýapqa tartyldy, dep habarlaıdy QazAqparat tilshisi.

Almaty qalalyq prokýratýranyń málimetinshe, Bostandyq aýdanynyń Sanıtarlyq-epıdemıologııalyq baqylaý basqarmasy «Kim Chi» kafesiniń ıesin karantındik shekteýler jaǵdaıynda jumys rejımin buzǵany úshin negizsiz ákimshilik jaýapqa tartty (QR ÁQBtK-niń 425-babynyń 1-bóligi boıynsha).

Monıtorıng toby mekeme saǵat 20:00-den keıin jumys istegenin anyqtady, osyǵan baılanysty kásipkerge 670 910 teńge nemese 230 AEK mólsherinde aıyppul salyndy.
«Almaty qalasynyń prokýratýrasy ákimshilik isti teksergen kezde kafeniń «Ashyq» kóshbasshysy mártebesin alǵanyn jáne onyń jumys rejımi saǵat 22:00-ge deıin uzartylǵanyn anyqtady»,-dep habarlady vedomstvadan.
Prokýrorlyq qadaǵalaý aktisi boıynsha ákimshilik jaýapqa tartý týraly qaýlynyń kúshi joıyldy, kásipker zańsyz salynǵan aıyppul tóleýden bosatyldy.