Almatyda Armenııadan ákelingen 33 kólik tirkeldi

ALMATY. QazAqparat – Almatyda bes kúniń ishinde 33 kólik tirkeldi. Bul týraly Almaty qalasy Ákimshilik polıtsııa basqarmasynyń basshysy Jandos Muratálıev aıtty, dep habarlaıdy QazAqparat tilshisi.

Memleket basshysynyń tapsyrmasy boıynsha, Qazaqstanda 1 maýsymnan 1 qyrkúıekke deıin Armenııadan jetikizilgen kólikterdi tirkeý bastaldy.

«Almatyda Armenııadan ákelingen 505 kólik bar. Onyń ishinde 119 kóliktiń róli oń jaǵynda. Byltyr jáne bıyl 88 kólik tirkelgen. Qazir patrýldik polıtsııa qyzmetkerleri kóshede Armenııadan jetkizilgen kólikterdi toqtatyp, olarǵa arnaıy jadynama taratyp jatyr. Onda osy kólikterdi qalaı tirkeýge bolatyny, qandaı qujat kerek ekeni kórsetilgen. Odan bólek, bul másele boıynsha koll-ortalyq ashyldy», - dedi Jandos Muratálıev.

Sonymen qatar, ol Armenııadan jetkizilgen kólikterge sary nómir beriletinin atap ótti.

«Sary belgi bul kóliktiń basqa azamattarǵa satylmaıtynyn bildiredi. Óziniń turǵylyqty jeri boıynsha salyǵyn tólep, Qazaqstan ishinde eshqandaı shekteýsiz júre beredi. ıAǵnı, elimizde tirkeýde turady», - dedi ol.