Almatyda "Árqashan kún sónbesin" atty qaıyrymdylyq aktsııasy ótip jatyr,
dep habarlaıdy QazAqparat.
"Aktsııada qala turǵyndarynan balalar úıinde tárbıelenýshi balalarǵa qajetti qural-jabdyqtar, kıim-keshek, oıynshyq, oqý quraldary jınalady. Jınalǵan qajettilikter ár aýdannyń jetimder úıine úlestirilip beriledi. Sharanyń maqsaty - jetim balalardy aıalaý, olardyń qoǵam aldyndaǵy alatyn ornyn dáripteý, alaqan jylýyn sezdirip, eshteńeden taısalmaı tolyqqandy azamat bolyp ósýine jaǵdaı jasaý", deıdi jobanyń koordınatory Nurjan Naǵashbekov.
Ol sonymen qatar, "Búgingi tańda dosynan basqa jaqyny joq, ata-ana qamqorlyǵyn kórmeı, jetimder úıinde telmirip ósip, er jetip kele jatqan balalarymyz qanshama. Qamshynyń sabyndaı ǵana qysqa ǵumyryńda jaqynyńa járdemdesý, aınalańa kómektesý, urpaq qamyn oılaý - bizdiń paryzymyz. Sondyqtan, osy aktsııany ótkizip jatyrmyz", dep atap ótti.
Shara aıasynda, maýsymnyń 1-i kúni Alataý aýdanyndaǵy "Januıa" jetimder úıinde qaıyrymdylyq kontsert ótip, tárbıelik máni bar móltek fılmder kórsetilmek.
Aktsııa mamyrdyń 31-ne deıin ótedi.