Almatyda «Ańsaǵan sábı» músini ornatyldy

ALMATY. QazAqparat - Almatyda «Ańsaǵan sábı» músini ashyldy. Músin Qazaqstan halqynyń reprodýktıvti densaýlyǵyn jaqsartýǵa baǵyttalǵan prezıdenttik baǵdarlamanyń qurmetine turǵyzyldy. Sondaı-aq, New Generation Clinic (NGC) zamanaýı halyqaralyq reprodýktsııa ortalyǵy ashyldy, dep habarlaıdy QazAqparat tilshisi.

2020 jyly Prezıdent Qasym-Jomart Toqaev «Ańsaǵan sábı» ulttyq jobasyn jarııalaǵan bolatyn. Bul baǵdarlama boıynsha bedeýlikti ekstrakorporaldy uryqtandyrý (EQU) ádisimen emdeýge jyl saıyn 7 myń kvota bólinedi, sol arqyly 2021 jyly elimizde 3 myń bala ómirge keldi. Bul týraly bıologııa ǵylymdarynyń doktory, professor, «EKOMED» adam urpaǵyn órbitý klınıkalar tobynyń ǵylymı jetekshisi, QR Ulttyq ǵylym akademııasynyń qurmetti Saltanat Baıqoshqarova aıtty.

«Qazaqstandaǵy árbir altynshy erli-zaıypty bedeýlikke shaldyqqan. Kórsetkishteri ósip kele jatqan resmı statıstıkaǵa sáıkes elimizde 21 myńnan astam adamǵa bedeýlik dıagnozy qoıylǵan. Bar kúsh-qýatym men qabiletimdi bedeýlikke qarsy kúreske arnaǵan reprodýktıvti medıtsına salasynyń mamany retinde men úshin bul músin jaı ǵana sımvol emes. Bizdiń maqsatymyz – reprodýktıvti medıtsına salasyndaǵy zertteýlerdi, ınnovatsııalardy qoldaý men damytýdyń mańyzdylyǵyna qoǵamnyń nazaryn aýdarý. Sonymen qatar, bedeýlik máselesine tap bolǵan erli-zaıyptylarǵa emotsıonaldyq kómek pen janashyrlyq tanytý da mańyzdy», - dedi ashylý saltanatynda Saltanat Baıqoshqarova.

Jańa qola músin New Generation Clinic (NGC) halyqaralyq reprodýktsııa ortalyǵy ǵımaratynyń qasbetine ornatyldy.
«Jańa músin reprodýktıvti medıtsına salasyndaǵy qajyrly eńbek pen jetistikterdi beıneleıdi. Ananyń alaqanyndaǵy sábıdiń beınesindegi kompozıtsııa - reprodýktıvti densaýlyq salasyndaǵy ǵylymı jańalyqtar men ınnovatsııalardyń mańyzdylyǵyn bildiredi. Músin – ana bolýdy armandaıtyn árbir áıeldiń qýaty men náziktiliginiń, senimi men batyldyǵynyń sımvoly», - dedi Saltanat Baıqoshqarova.

Ol sondaı-aq New Generation Clinic (NGC) klınıkasyn ashý týraly oıymen bólisti.
«Qazirgi tańda reprodýktıvti tehnologııalar úzdiksiz damyp keledi. Men «Ekomed» klınıkalar tobynyń Qazaqstan men Ortalyq Azııadaǵy ekstrakorporaldy uryqtandyrý salasyndaǵy kóshbasshyǵa aınalǵanyn maqtan tutamyn. Áý bastan-aq qazaqstandyq reprodýktıvti medıtsınaǵa sońǵy jańalyqtar men tehnologııalardy engizýdi maqsat etkenmin. Osylaısha, New Generation Clinic (NGC) zamanaýı halyqaralyq reprodýktsııa ortalyǵyn iske qosý ıdeıasy dúnıege keldi. Bul álemdik standarttarǵa sáıkes jumys isteıtin, eń joǵary sanattaǵy qyzmet pen emdeýdi usynatyn ozyq jańa býyn klınıkasy. Munda Qazaqstanda alǵash ret jasandy ıntellekt arqyly bedeýlikti emdeýdiń eń zamanaýı ádisteri qoldanylýda», – dedi dáriger.
«Ańsaǵan sábı» músinin «Art Alıans» shyǵarmashylyq tobynyń músinshileri jasap shyqty.
«Bul músindi jasaýǵa eki aıǵa jýyq ýaqyt ketti. Biz birneshe eskız jasaǵan edik. Olardyń ishinen osy «Ańsaǵan sábı» eskızine toqtadyq. Músinniń bıiktigi 2,5 metr, qoladan jasalǵan. Budan bólek, «Úmit» degen músin jasap, ony klınıkanyń ishine ornattyq. Aıta keteıik, biz bul músinderden bólek, Almatydaǵy asharshylyq qurbandaryna arnalǵan, Ybyraı Altynsarın músinin, Tarazda Dinmuhamet Qonaevtyń, Asatanada Ál-Farabıge músin jasaǵan bolatynbyz», - dedi «Art Alıans» shyǵarmashylyq tobynyń músinshisi Dýlat Úsenbaev.