Almatyda amerıkalyq negizinde qurylǵan medııa mektep ashyldy

ALMATY. QazAqparat – Almatyda QR Prezıdenti Qasym-Jomart Toqaevtyń tapsyrmasymen 2021 jyly medııa jáne kıno mektebi quryldy. Jańa kınomektep kınematografııa salasynda suranysqa ıe jańa mamandyqtar boıynsha qoljetimdi jáne sapaly bilim men kadrlar daıarlaýǵa baǵyttalǵan, dep habarlaıdy QazAqparat tilshisi.

Jańa mekteptiń maqsaty – eldegi kreatıv ındýstrııanyń damýyna belsendi úles qosatyn, buqaralyq aqparat quraldary men kıno naryǵynyń zamanaýı talaptaryna saı keletin mamandardy daıarlaý.

Alǵashqy stýdentterdi oqýǵa qabyldaý 2021-2022 oqý jylynda bastaldy. Oqý baǵdarlamasyna engizilgen pánder álemdegi jetekshi oqý baǵdarlamalaryna negizdelgeni, al oqytýshylary – kásibı biliktiligi ǵylymı-tájirıbelik jumystarmen rastalǵan mamandar.

«Búgin biz uzaq joldyń basynda turmyz. Jáne bul jol ár oqýshy úshin qyzyqty ári tıimdi bolǵanyn qalaımyn. Nátıjesinde elimizdi, aınalamyzdy tek jaqsylyqqa ózgertetin úlken jetistikterge jetýimiz kerek. Barlyǵyna sáttilik pen tabys tileımin», - dedi kıno mektebiniń resmı ashylýynda «Qazaqfılm» kınostýdııasynyń prezıdenti Ahan Sataev.

Kıno mektebinde jas talanttar negizgi 3 baǵdarlama boıynsha bilim alady: «Kreatıv óner oqý», «Jańa medıa» jáne «Dıdjıtal mádenıet oqý». Stýdentter kınorejısser, rejısser, anımatsııalyq rejısser, mýltımedııalyq baǵdarlamalardyń dırektory, telerejısser, stsenarıst, art-menedjer, kınotanýshy, prodıýser, radıo jáne telejúrgizýshi sııaqty mamandyqtardy alady.

Birinshi kýrs stýdenti Saǵyndyq Erkinbek kıno mektebinde orman týraly alǵashqy qysqametrajdy fılmin túsirip úlgerdi.

«Kishkentaı kezimnen vıdeo túsirgendi unatatynmyn jáne fılmderdegi dramatýrgııaǵa qyzyqtym. Men adamdardy tań qaldyrý úshin bir nárse jasaǵym keldi. Osy mektepte oqyr júrip kem degende eki fılm túsirip, túrli kınofestıvalderge qatysqym keledi», - deıdi birinshi kýrs stýdenti.

Qazaqstan kınosynshylary qaýymdastyǵynyń prezıdenti Gúlnár Ábikeevanyń aıtýynsha, medııa jáne kıno mektebiniń bilim berý jáne tájirıbelik baǵdarlamasy Arızona ýnıversıtetiniń amerıkandyq bilim berý negizinde qurylǵan.

«Bizdiń bilim berý jáne tájirıbelik baǵdarlamamyz Arızona ýnıversıtetiniń amerıkalyq bilim berý negizinde qurylǵan. Olardyń Los-Andjeleste kıno mektebi bar, onda bizdiń stýdentter onlaın dáris oqı alady. Sonymen qatar, stýdentterimizdiń bir semestr Amerıkada oqýǵa múmkindigi bar. Kıno mektebiniń erekshelikterine toqtalsaq, qazaq fılmderin shyǵarýmen tyǵyz baılanysta, prodıýserlikke úlken mán beriledi»,- deıdi kınotanýshy Gúlnar Ábikeeva.