Almatyda «Altyn júrek» júldesi tapsyryldy
Búgin Almatyda jyl saıynǵy «Jomart júrek» baıqaýynyń qorytyndysy shyǵaryldy. «Jomart júrek» baıqaýy Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Rýhanı jaǵyrý» baǵdarlamasy aıasynda quryldy jáne Memleket basshysy Qasym-Jomart Toqaev alǵa qoıǵan kásipkerler men jeke tulǵalardyń qaıyrymdylyq jobalaryna qatysýlaryn janama yntalandyrý tetikterin engizý máselesin sheshýge múmkindik beredi.
Baıqaýdyń basty maqsaty — eń jarqyn jáne mańyzdy qoǵamdyq bastamalardyń oń tájirıbesin dáripteý arqyly qaıyrymdylyq jasaýdy yntalandyrý jáne damytý.
Almaty ákiminiń orynbasary Erjan Babaqumarov baıqaýdyń laýreattaryn marapattap, halyqtyń ál-aýqatyn jaqsartýǵa jáne qalanyń gúldenýine qosqan úlesteri úshin alǵysyn bildirdi.
Bıyl Almatyda qalanyń ınfraqurylymyn abattandyrý men jaqsartý boıynsha iri áleýmettik jobalar júzege asyryldy. Almatynyń metsenattary túrli baǵyttar – bilim, sport, mádenıet boıynsha barynsha aýqymdy qaıyrymdylyq sharasyn júzege asyrdy.
Syılyqtar bes nomınatsııa boıynsha tabystaldy.
Baıqaýdyń jeńimpazdary:
Jyl tulǵasy - belsendi qaıyrymdylyq qyzmeti úshin – Syrymbek Taý, «Daco Motors KZ» JShS bas dırektory. Metsenat 8 500 otbasyǵa azyq-túlik sebetteri men medıtsınalyq qyzmetkerlermen qamtamasyz etý arqyly kómektesti. Naýqas balalarǵa arnalǵan ońaltý ortalyǵynyń qurylysyna 20 mıllıon teńge bóldi. «Mektepke jol» baǵdarlamasy aıasynda 100 balaǵa oqý quraldaryn, 10 planshet pen 5 noýtbýk alyp berdi. Úsh otbasynyń turǵyn úı satyp alý úshin bastapqy tóleminiń 30%-yn tóledi, balalar úıine, «Saýran», «Alataý» qaıyrymdylyq qorlaryna kómek kórsetedi.
Jyl metsenaty – belsendi metsenattyq qyzmeti úshin – Dolkýntaı Abdýlhalıl, «METALL PROM GROUP» JShS dırektory. Kompanııa ómirlik qıyn jaǵdaıǵa tap bolǵan 5 myń otbasyǵa azyq-túlik sebetteri túrinde kómek kórsetti. Ol Almatydaǵy jas sportshylarǵa jáne birqatar sport klýbtaryna demeýshilik jasaıdy. Jasóspirimder arasyndaǵy respýblıkalyq jarystardy uıymdastyrýǵa demeýshilik kórsetti. Dolkýntaı Abdýlhalıl bıyl qaıyrymdylyqqa barlyǵy 88,7 mln tg bóldi.
Týǵan ólke – kishi otandy qoldaý boıynsha áleýmettik mańyzy bar jobalardy júzege asyrǵany úshin – Muhamethan Sabyrjan. Ol 4 balalar sport alańynyń qurylysyna demeýshilik jasady, muqtaj otbasylarǵa úılerin jóndeýge 4 mln tg kóleminde kómek kórsetti.
Jyldyń úzdik uıymy – qaıyrymdylyq baǵdarlamasyn tıimdi iske asyrý úshin – JShS «BAZIS-A Corp». Kompanııa Bostandyq aýdanyndaǵy №146 mektepke 300 balaǵa arnalǵan qosalqy korpýsty óz qarjysyna saldy. Kásiporyn №65 mektep aýmaǵynda 300 oryndy korpýs salýdy josparlap otyr.
Jyldyń úzdik qamqorshysy – áleýmettik mańyzdy ózgerister men túrlendirý boıynsha qaıyrymdylyq kómegi úshin – «Kometa» JShS. Kompanııa qaıyrymdylyq sharalaryna qatysty, múmkindigi shekteýli balalarǵa kómek kórsetedi, mobıldi aýrýhanalarǵa sý jetkizýge demeýshilik kómek retinde 10 mln qarjy bóldi. Olar №1 balalar úıine, «Januıa» arnaıy keshenine, №123, 149 balabaqshalarǵa jáne pedıatrııanyń ǵylymı ortalyǵyna únemi kómek kórsetedi.
«Bizdiń kompanııa qaıyrymdylyqpen 10 jyl boıyna aınalysyp keledi. Biz balalar úıine kómektesemiz, ınteraktıvti taqtalar, oqý oıyndary men kitaptar satyp aldyq, balalarǵa arnalǵan tegin sport zalyn ashtyq, otbasylarǵa úı salýǵa kómektestik. Bul marapat men úshin úlken motıvatsııa. Joǵary baǵa qalaǵa, bizdiń turǵyndarǵa kómektesýge degen umtylysty odan ári arttyrady», — dedi Dolkýntaı Abdýlhalıl.
Aıta keterligi, metsenattar megapolıs pen onyń turǵyndaryna turaqty túrde kómek kórsetedi. Demek, uıymdastyrýshylar atap ótkendeı, mundaı is-sharalar bıznes-qurylymdardyń, metsenattardyń, úkimettik emes uıymdardyń ókilderi men eriktilerdi jaqsy ister jasaýǵa yntalandyrady jáne meıirimdilik ıdeıasyn nasıhattaıdy.